«Хатыны белән баласын ашату өчен тырышты». 17 яшьлек егет бина сүткәндә һәлак булган

Оренбург өлкәсендә 17 яшьлек егет бина хәрабәләре астында калып үлгән. Аның өстенә кирпеч стена ишелеп төшкән. Бу турыда «Комсомольская правда» хәбәр итте.

Черноречье авылында яшәүче 17 яшьлек Алексей (исеме үзгәртелә) 8 апрельдә Чистое авылында һәлак була.

Алексей һәм тагын берничә балигъ булмаган үсмер эшмәкәргә эшкә яллана. Алар төзелеп бетмәгән 2 катлы йортны сүтәргә тиеш була. Шлакблоклардан ясалган бина авыл читендә инде күптәннән тора. Башта анда кафе ясамакчы булалар, аннары саталар, яңа хуҗа бинаны сүтәргә була.

Егетләр иртәдән эшкә керешә. Көндезге 3ләр тирәсендә ике катлы стена Алексей өстенә ава, ул урында ук үлә.

Orenburg.kp.ru белешмәсе буенча, Алексей мондый эшләргә еш йөри. Ул күп балалы гаиләдә үскән, әнисенең тагын 7 баласы бар. Алексей, якыннарына ярдәм итү өчен, өстәмә эшләргә бара.

Үзе дә 1 ел элек әти булган, бергә яши торган хатыны бар. Алексей үз гаиләсе белән аерым яши, хатыны белән баласын ашату өчен акча эшләргә тырыша. Тикшерү эшләре бара, диелә хәбәрдә.