Сунтаардар чөмпүйүөнү өрөгөйдүү көрсөллөр
Көҥүл тустууга Арассыыйа первенствотын муҥутуур кыайыылааҕа Лев Павлов спортсмен быһыытынан санаатын ситиһэн, кыайыы үктэллээх дойдутугар кэллэ. Кинини улуус дьаһалтатыгар биир дойдулаахтара эҕэрдэлии көрүстүлэр. Тустууга федерация Сэбиэтин бэрэссэдээтэлэ, улуус баһылыга Анатолий Григорьев икки бүк үөрүүлээх, Сунтаары дорҕоонноохтук ааттаппыт эдэр уолбутугар 100 тыһ.солкуобайдаах туоһу суругу туттарда.
Таһымнаах күрэххэ барыта 306 бөҕөс күөн көрүстэ, ол иһигэр Сунтаар улууһуттан 5 спортсмен кыттыыны ылла. Лев Павлов 21-гэр диэри саастаах 57 ыйааһыннаахтары кытта туһунна. Кини күрэс саҕаланыаҕыттан бэйэтигэр эрэллээҕэ көстөр этэ. Утарсааччыларыгар үгүстэригэр биир да баалы биэрбэккэ, көхтөөх киирсиини көрдөрдө. Финалга сытыы хапсыһыыны көрөөрү, уолга өйөбүл, күүс-көмө буолаары Сунтаартан бүтүн делегация тиийэн ыыарыйда. Онон Лев эргиччи эрэнэр дьонноох буолан уонна хас да сыллаах хаачыстыбалаах дьарык, кинини ситиһиигэ тириэртэ.
Хас биирдии спортсмен сыл ахсын дьарыгын сайыннаран, инники диэки дьулуһар. Кыайыылар сиэттиһэн кэлэн истэхтэрин ахсын, өссө үрдүккэ дабайыыга кынат анньар. Лев тренердэрин уонна биир дойдулаахтарын көмөлөрүнэн спорт үрдүкү чыпчаалыгар тахсыа диэн эрэлбит улахан.