Табиб: карлыган кайнатмасы баш мие өчен бик файдалы

Карлыган кайнатмасы баш мие өчен файдалы. Бу хакта Красногорск хастаханәсе табиб-терапевты Екатерина Сысоева сөйләгән, дип яза «Аргументы и Факты».

Аның сүзләренчә, кара һәм кызыл карлыган – файдалы матдәләр буенча рекордчылар. Әлеге җиләкләрдә С витамины югары концентрациядә: 100 граммга 250 миллиграммга кадәр, аның составында шулай ук В, А, E, K төркеме витаминнары һәм төрле микроэлементлар да бар.

Моннан тыш, кара карлыган һәм аннан ясалган кайнатмада антоцианнар – җиләкләргә төс бирә торган үсемлек пигментлары бар. Алар баш миенә үтеп керергә, нейроннарны ялкынсынудан сакларга, баш миенә кан килүне яхшыртырга һәм деменция куркынычын киметергә сәләтле, дип уртаклашты Сысоева.

Табиб карлыган кайнатмасын күп итеп ашарга ярамавын да искәртә. Өлкән яшьтәгеләргә, баш мие һәм кан тамырлары сәламәтлеген ныгытып тору өчен 1 кашык та җитә, ди ул.

Шикәр диабеты һәм симерүдән интегүче кешеләргә кайнатма белән мавыкмаска кирәк, ә баш әйләнү һәм хәлсезлек хас булган гипотония белән авыручылар чәй белән 1 кашык карлыган кайнатмасын кабып куйса, бу – аларга файдага булачак, чөнки ул баш миен тиз арада углевод белән тукландырачак, диелә хәбәрдә.