МР-нь спортонь министерствась яволявтынзе 2025 иень невтевкстнэнь (эрзя)
Мордовиясь эште весть невтизе, сон – Россиянь спортонь прявт регионтнэстэ вейкесь, изнясь редявикс результатт кода регионсонть, истя жо весе Россиянь пелькстамотнесэ.
Весемезэ анокстазельть спортонь малав 730 покш тевть, конатнесэ примасть участия малав 170 тёжат ломанть. Невтемакс, мелят невтевкстнэ ульнесть малав 20 тёжат участникть ды ваныцят.
Регионось ютавтсь 121 сехте покш сэрень пелькстамот. 2025 иестэ ютавтозельть Россиянь 12 чемпионатт, 13 кубкат, 17 первенстват, раськеютконь 2 пелькстамот, ПФО-нь 5 чемпионатт.
Республикасонть покш мель явовсь массовой спортонтень ды од ломантнень марто важодемантень. Весе Россиянь содавикс акциятне – «Лыжня России», «Кросс нации», «Золотая шайба» ды “Кожаный мяч” – пурнызь Мордовиянь эрьва кодамо иень тёжат эрицятнень. Теде башка, ветерантнэнь ды специальной военной операциянь участниктнень туртов ютавтозь малав 30 мероприятият, конат аравтозь шумбрачинь ванстомантень ды социальной адаптациясо лездамонтень.
Мордовиянь спортонь министерствась касты-кепети спортонь инфраструктуранть, нежеди объекттнэнь доступностенть ды вадрячинть лангс. Регионсонть теевсть спортонь “превей” площадкат Саранскойсэ, Ельниксэ, Зубова-Полянасо ды Инсарсо. Строязь ды одкстомтозь ламо функциянь спортонь ды социальной куншкакурот, истя жо Комсомольский важодемань поселкасонть инновациянь комплексэсь. Истя жо прядозь Саранскойсэ Пушкинэнь куросонть теннисэнь комплексэнь ды Рузаевкань буесэ эйкакшонь-од ломанень спортонь школань витнематне. Теде башка, Саранскойсэ, Покш Игнатовасо, Зубова-Полянасо, Кемлясо, Темниковасо ды Теньгушевасо теевсть ГТО-нь тестированиянь куншкакурот.