Синь азонкшнесазь пряснон банконь, правоохранительнай органонь сотрудникокс и раднякс, конат бта повсть зиянц (мокша)
И эрь кодама туфталса мярьгондихть юмафтомс эсь ярмакснон. Мошенникнень шобда тевснон колга темась ульсь и ляткшни таколфтыкс. Аньцек ётай кизонь декабрьста синь кячказост Мордовияса повсть 130 эряй, а марнек 2025- це кизоня эздост пяк лама – 1200 ломанць васькафтовсть. Карьхцнень лувкссна 500 миллиотт цалковайхть. Синь ётксост улихть од ломатть. Васькафнематне улендихть эрь кодапт. Мошенникне гайкфнихть банконь, социальнай службань сотрудникнень лемста и пачфнихть аф прокс виде операциятнень колга. Штоба “араламс” эсь ярмакнень, кальдяв тевонь тиихне мярьгондихть ётафтомс синь аф пелькс счёттненди. Кой-коста лемнесазь пряснон мала ломанькс, конат повсть бта зиянц, и конатненди куроконя эрявксть лама ярмакта. Тя сембось – васькафнихнень налхкомасна и эряви содамс, кода сонь инголдамс. Эсь кальдяв тевснон эса звонокта башка синь нолясазь социальнай сеттнень и мессенджерхнень. Синнесазь акаунттнень или тиендихть аф афкуксонь страницат, кучсемок сообщениятнень содаф ломаттненди, эняльткшнихть кеподемс ярмакт. Кда тейнть кучсть тяфтама сообщения или звонок или тинць васькафтоведе – пачфтеда правоохранительнай оргаттненди!