Майаҕа эр дьон Оһуохайа дуорайыа
Быйыл үгэс буолбут культура уонна спорт эстафетата Манчаары төрөөбүтэ 220, Мэҥэ — Хаҥалас улууһа төрүттэммитэ 95, Улуу Кыайыы 80 уонна Майа сэлиэнньэтигэр «Төрүччү» сылларыгар ананар.
Эстафета хас да көрүҥүнэн ыытыллыаҕа, ол курдук, эр киһи Оһуохайа, спортивнай күрэхтэһиилэр, «Ходулов — Фест — 2025» испэктээкиллэри көрүү уонна уус — уран самодеятельнай кэнсиэр.
Алексей Неустроев, «Майа сэлиэнньэтин» тыа сирин түөлбэтин баһылыга «Сахалайфка» бу курдук иһитиннэрдэ:
— Бу Эстафета чэрчитинэн сылын аайы ыытыллар Оһуохай күрэҕэр бөлөх аайы 40-гэр уонна 40 үөһээ саастаах эр дьон кыттар. Бөлөх түһүлгэтигэр 25 эр киһиттэн итэҕэһэ суох сахалыы таҥастаах киһи кыттара уонна икки Оһуохайы таһаарааччы ирдэнэр, матыыба буоллаҕына көҥүл, этээччи тутатына этэрэ биһирэнэр, ол иһин хааччах суох, эбэһээт мэҥэлии, сунтаардыы этээһин диэн буолбатах. Бэртээхэй тэрээһин ыытыллан эрэриттэн биһиги үөрэбит этэ.
Уонна быйылгы биир улахан сонун уратыбыт диэн — Саха сирин Оһуохай түмсүүтүн салайааччыта Александр Джурович Данилов — Дьулуур Хан көмөтүнэн биһиэхэ дьүүллүүр сүбэ састаабыгар Дарханнар Сүбэлэрин бэрэссэдээтэллэрэ, Дархан этээччи Валентин Хорунов, СР үтүөлээх этээччитэ Данил Пестряков, чулуу кынат Александр Барчахов, Оһуохай түмсүү салайааччытын солбуйааччыта Александр Тарскай киирдилэр. Түгэнинэн туһанан Александр Джуровичка махтал тылбытын тиэрдиэ этибит.
Оһуохай күрэҕэ олунньу ый 9 күнүгэр сарсыарда 11 чаастан «Кыталык» улуустааҕы уопсастыбаннай кииҥҥэ ыытыллыаҕа. Ааҕааччылары көхтөөх кыттыыны ыларгытыгар ыҥырабын
Александр Джурович Данилов — Дьулуур Хан, Оһуохай түмсүү салайааччыта:
— Биһиги түмсүүбүт өрөспүүбүлүкэ оройуоннарыгар ыытыллар тэрээһиннэргэ көхтөөх кыттыыны ылабыт уонна өйүүбүт. Ол иһин Майаҕа буолар Эстафетаҕа биллиилээх этээччилэрбит тахсан дьүүллүүр сүбэҕэ үлэлиэхтэрэ, бэйэлэрин уоппуттарын кытта үллэстиэхтэрэ. Биһиэхэ Алексей Неустроев диэн эдэр, эрчимнээх, кэскиллээх салайааччы, Майа сэлиэнньэтин баһылыга тахсан, өйүөххүт дуо диэн этии киллэрбитигэр, тутатына сөбүлэстибит, маннык салайааччылардаах буоллахпытына саха норуота сайдыа, кыайыа — хотуо, саҥа саҕахтары дабайыа, биһиги киэн туттуохтаахпыт!
Быйыл Ил Дархан Айсен Николаев Уурааҕынан Саха Сиригэр Дойдуну көмүскээччи сыла биллэриллибитэн, араас таһымнаах тэрээһиннэри ыытаары былааннныы сылдьабыт, өссө да биллэрэн иһиэхпит!
Сообщение Майаҕа эр дьон Оһуохайа дуорайыа появились сначала на SAKHALIFE.