Чирмешәннең мәдәният хезмәткәрләре «Халкым минем» фестивалендә Татарстан данын яклады
(Чирмешән, 6 апрель, «Татар-информ», «Безнең Чирмешән» , Кадрия Гамирова). Чирмешән районы мәдәният хезмәткәрләре һәм үзешчәннәре Самара өлкәсенең Похвистнево районы Гали авылында узган «Халкым минем» муниципальара иҗат фестивалендә районның гына түгел, ә республика данын яклады.
Фестивальдә районнан утызлап кеше катнашты, алар тугыз концерт номеры алып барды.
Жюри һәм тамашачылар күңеленә хуш килгән дүрт номер призлы урыннарга лаек булган. Әлфия Закирова — «Кыр казлары» һәм Салават Закиров «Шәмәгем» җыры өчен беренче дәрәҗә лауреат Дипломнары белән кайтты.
Альмир Жораев тәкъдим иткән «Әйтелмәгән мәхәббәт», Зәлидә Кәримова башкаруында «Әнием» җырлары икенче дәрәҗә лауреат Дипломы белән бәяләнгән. Калган биш концерт номеры башкаручылар фестиваль дипломантлары булган.