Фаҗигале антирекорд: 9 октябрьдә коронавирустан үлүчеләр саны меңгә якынлашты
9 октябрьдә коронавирустан үлүчеләр саны 968 булды. Ковид оператив штабы мәгълүматлары шундый. 8 октябрьдә 936 кеше вафат иде.
Иң күп кеше Мәскәүдә (70), Петербург (61), Свердловск өлкәсендә (48) үлгән.
Пандемия башланганнан бирле Татарстанда 788 кеше үлгән. Әмма соңгы арада үлүчеләр саны кисәк артты - 4 октябрьдә 8, 8 октябрьдә 7 очрак теркәлде.
Ковид йоктырган кешеләр 29 362 булды. Бу быелгы антирекорд. Моннан да зуррак күрсәткеч былтыр 29 декабрьдә булган иде (29 935).
Иң күп авыручылар Мәскәү, Петербург, Самара, Түбән Новгород, Башкортстанда теркәлгән.
Коронавирус пандемиясе башланганнан бирле Россиядә бу авыру 7 746 718 кешедә теркәлгән. Дөньяда 236,6 миллион авыручы бар дип исәпләнә.
Прививка ясатучылар арасында коронавирусны авыр кичерүчеләр 0,03 процент диде сәламәтлек саклау министры Михаил Мурашко һәм тагын бер кат вакцинация үтәргә чакырды.