Рөстәм Миңнеханов Татарстан һәм Россия дәүләт бүләкләрен тапшырды
(Казан, 27 декабрь, «Татар-информ»). Татарстан Республикасы Президенты Рөстәм Миңнеханов алдынгы татарстанлыларга Россия һәм республика дәүләт бүләкләрен, фән һәм техника өлкәсендә РФ Хөкүмәте премияләрен тапшырды. Чара Казан Кремлендә узды. Татарстан Президенты искәрткәнчә, узып барган елда республика тотрыклы үсешне дәвам итте — Россиянең зур инфраструктура проектларын гамәлгә ашыру башланды, яңа мәктәпләр, балалар бакчалары, башка социаль-мәдәни объектлар ачылды. 2021 ел мөһим иҗтимагый-сәяси вакыйгалар белән истә калачак, алар арасында Казан Изге Ана иконасы соборын изгеләндерү, Җиңү паркында сугышчы-интернационалистларга мемориал ачу чаралары бар.
«Бу — рухи һәм әхлакый яңарышның, күпмилләтле Ватаныбызның тарихи һәм героик традицияләренә хөрмәтнең мөһим символлары», — диде Рөстәм Миңнеханов. Президент татарстанлыларның зур төркеме бүген Россия бүләкләре белән бүләкләнүен әйтте. РФ Президентының Мактау грамотасы «Татнефть» ГАҖ директорлар советы рәисе киңәшчесе Шәфәгать Тәһаветдиновка, Мактау ордены «КАМАЗ-Мастер»ның техник директоры Владимир Губинга тапшырылды. «Татарстан» ДТРК журналисты Йолдыз Крепостина республикада беренче булып «Россия Федерациясенең атказанган журналисты» дигән яңа мактаулы исемгә лаек булды. Рөстәм Миңнеханов шулай ук «ТАИФ» төркеменең «Казаноргсинтез» коллективын котлады, оешма РФ Хөкүмәтенең фән һәм техника өлкәсендә 2021 ел премиясен алды. Татарстан омбудсмены Сәрия Сабурская, Качалов исемендәге театр җитәкчесе, РФ һәм ТРның халык артисты Александр Славутский «Татарстан Республикасы алдындагы казанышлары өчен» ордены белән бүләкләнде. Бүләкләргә шулай ук сәламәтлек һәм иминлек сагында торган медицина учреждениеләре һәм Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең ТР буенча идарәсе хезмәткәрләре дә тәкъдим ителде.