Орусияда оппозициялык саясатчы Борис Немцовду эскерүү акциялары болду
Москвада жана Орусиянын башка шаарларында оппозициялык саясатчы Борис Немцовду эскерүү акциялары өттү. Маркум 2015-жылы 27-февралда Кремлге жакын жерде киши колдуу болуп өлгөн.
Башкалаада акыркы маалыматтарга караганда жөө жүрүшкө 10 миңдей киши катышты. Полиция азырынча өз сандарын айта элек. Акцияны бир катар оппозициялык уюмдар уюштурушкан.
Жүрүштө «Орусия эркин болот», «Орусия Путинсиз» деген ураандар жаңырып турду. Ошондой эле саясий туткундарды бошотуу талаптары айтылып жатты.
Жүрүштөн кийин катышуучулардын бир бөлүгү Немцов өлтүрүлгөн жерге барып гүл коюшту.
Санкт-Петербургда уруксат берилген митингге миңдей киши катышты. Маркум саясатчыны эскерүү пикеттер ондогон башка аймактарда да өттү.
Немцов мындан 4 жыл мурун 27-февралда кечинде Москванын чак ортосунда бир нече ок жеп каза тапкан, саясатчыны өлтүрүү үчүн Чеченстандын 5 тургуну айыптуу деп табылган.
Жекшембиде маркумдун кызы Жанна Немцованын адвокаты Ольга Михайлова оппозициячынын жакындары тергөөнүн жүрүшү тууралуу маалыматты ала алышпаганын «Интерфакска» билдирди.
Орусиянын Тергөө комитети мекеме издөө жарыяланган Руслан Мухудиновду табуу аракетин көрүүдө деп буга чейин айтып келген. Тергөөчүлөр дал ошол адам саясатчынын көзүн тазалоо буйругун берген жана уюштурган деп санашат.