«Дориан» куюну Жоржия менен Түштүк Каролинага жакындады
«Дориан» шамалынан улам АКШнын Жоржия менен Түштүк Каролина штаттарында, жээкке жакын аймакта жашагандарды милдеттүү түрдө коопсуз жайга убактылуу көчүрүү иштери башталды. Жоржия штатынын губернатору Брайан Кэмп «Твиттердеги» баракчасына: «Куюндун кесепети катуу болушу мүмкүн. Мындан улам жээкке жакын жашагандар там-ташын таштап, коопсуз жайда баш калкалап тура турушу зарыл» деп билдирди.
Түштүк Каролинанын губернатору Генри Максмастер жашоочуларга кайрылып жатып:
- Биз баарын бактылуу кыла албайбыз. Бирок биз ар бир адамдын өмүрүн сактап кала аларыбызга ишенебиз, - деди.
Куюнга байланыштуу Флорида менен Түндүк Каролина штаттарында өзгөчө абал жарыяланды.
АКШ президентинин улуттук коопсуздук боюнча кеңешчиси Жон Болтон тургундарды түштүк-чыгыш аймактардагы жээктен оолак болууга чакырды.
Катуу шамалдан Багам аралдары жабыркады.