Кыргыз өкмөтү Кытай жана Индия менен өнүктүрүү фонддорун түзүүнү көздөп жатат

Кыргызстан Орусия менен түзгөн өнүктүрүү фонду сыяктуу бирикмелерди Кытай жана Индия мамлекеттери менен да түзүүнү көздөп жатат. Бул тууралуу өкмөт башчы Мухаммедкалый Абылгазиев 12-ноябрда Жогорку Кеңеште былтыркы жылдын бюджетинин аткарылышы жөнүндөгү мыйзам долбоору биринчи окууда каралып жатканда билдирди.


Премьер-министрдин айтымында, мындай фонддордун каражатын жаштардын ишкерлик демилгелерин колдоого жумшоо планы бар:


- Орус-Кыргыз фонду, мамлекеттик банктар сыяктуу инструменттерди көбөйтүшүбүз керек. Орус-кыргыз фондуна окшогон дагы сүйлөшүүлөр жүрүп жатат Индия менен, Кытай менен биздин ишкерлерди каржылоо механизмдери тууралуу. Фонддордукун көбүнчө жаштардын ишкердигин колдоо, стартаптар боюнча кийинки жылы 2 миллиард сомдун башы чыгып жатат.


Орус-Кыргыз өнүгүү фонду 2014-жылы түзүлгөн. Кыргызстандын Евразия экономикалык биримдигинин шарттарына ылайыкташуусуна көмөк көрсөтүү максатында орус өкмөтү бөлгөн 500 миллион доллардан кыргызстандык ишкерлерге насыя берилүүдө. (RK)