Футбол: Кыргызстан Сингапурду 2:1 эсебинде жеңди
Оюндун 1-таймы 0:0 эсебинде тең чыгуу менен аяктаган. 55-мүнөттө Сингапур оюнчусу Ю Янг Сонг эсепти ачты. 77-мүнөттө сингапурлук Ю Янг Сонг Виктор Майерге карата эреже бузуп, калыс пенальти дайындады. Капитан Валерий Кичин топту дарбазага таамай тээп, эсепти теңеди.
80-мүнөттө Кыргызстандын жарым коргоочусу Виктор Майер Сингапурга 2-голду киргизди. Мындан көп өтпөй сингапурлуктар Кыргызстандын дарбазасына гол киргизүүгө аракет кылып, бирок офсайд абалы болгону үчүн эсептелген жок.
Беттештин негизги убактысына башкы калыс беш мүнөт убакыт кошуп берди. Бул убакытта оюн эсеби өзгөргөн жок.
Футбол боюнча Азия кубогуна тандоо оюндарында Кыргызстан F тайпасында Сингапур, Тажикстан жана Мьянма командалары менен Бишкекте ойнойт. Турнирдик таблицада азырынча Тажикстан менен Кыргызстандын эсебинде үчтөн упай бар.
Бүгүн, 8-июнда бул тайпада 1-турда Тажикстан жана Мьянма командалары беттешип, оюн тажикстандыктардын пайдасына 4:0 эсебинде аяктады.
Кыргызстандын футболчулары алдыда 11-июнда Мьянма, 14-июнда Тажикстан менен беттешет. Азия кубогунун тандоо оюндары жалпысынан алты тайпада өтүп жатат. Тайпада лидер болгон алты команда жана экинчи орунду алган беш мыкты команда бир жылдан кийин Кытайда өтө турган Азия кубогуна жолдомо алат. Кыргызстан буга чейин 2019-жылы Бириккен Араб Эмиратында өткөн Азия кубогуна катышып, 1/8 финалга чейин жеткен. (ECh)