Кыргызстандын Ички иштер министрлигинин маалыматы боюнча, Орусиянын аймагында дайынсыз кеткен 39 кыргызстандык изделүүдө. Маалыматта айтылганга караганда, жыл башынан бери Ички иштер министрлигинин Москвадагы өкүлчүлүгүнө 66 адам кайрылып, Орусия Федерациясынын аймагында дайынсыз жоголуп жаткан жакындарын табууга жардам берүүнү өтүнүшкөн. Өткөн жылдан бери милиция тарабынан 28 жаран изделип жаткан, а негизи жалпысынан туугандарына кат-кабарын айтпай кеткен 94 кыргызстандык изделип келген. Алардын ичинен 55 жаран Москванын ички иштер башкармалыктарынын жардамы менен табылган, анын отуз тогузу менен быйыл байланышууга мүмкүндүк түзүлдү.
Ички иштер министрлигинин маалыматы боюнча, ушул тапта Кыргызстандын дагы 39 жараны дайын-дарексиз болуп турган чак.
Ички иштер министрлиги кат-кабарсыз кеткендер тууралуу маалымат менен кененирек сайттан таанышууга мүмкүн экенин, алардын бирөө-жарымынын дайын-дарегин билгендер болсо милицияга маалымат берүүнү өтүнөт.
Маалыматтар боюнча чет мамлекеттерде бир миллиондон ашуун кыргызстандыктар иштеп, жашап жүрөт, алардын көбү Орусияда.
