ТУРКЛАР РУС АСКАРЛАРИНИНГ БОШ ЧАНОҒИДАН МИНОРА БУНЁД ЭТМОҚЧИ. НЕГА?..
Яқинда Россиянинг Туркиядаги элчиси Алексей Ерхов яна турклар уни ҳақоратлар, қўрқитишлар билан «сийлай» бошлаганини маълум қилди.
— Биз Россия аскарларининг бош чаноғидан миноралар бунёд этамиз, — каби қўрқитишларни тилга олишди улар, — деди элчи. — Россия тўкилган ҳар томчи қон учун албатта жавоб бераркан…
Ерховнинг гапига кўра, бундай гапларга жиддий эътибор бермасликнинг имкони йўқ. Аммо у ўзининг хавфсизлиги учун айтарли қайғурмайди. Негаки, уни аъло даражада қўриқлашади.
Яна Ерхов шу гапни айтиб ўтдики, юқоридагиларга ўхшаш гапларни тарқатаётганлар Россия ва Туркия ўртасига совуқчилик тушириш, икки давлатни бир-бири учун душманга айлантиришни мўлжалламоқда.
Ерхов 13 феврал куни ҳам ўз номига турклар томонидан ҳақоратлар, қўрқитишлар ёғилганини айтганди. Унда Сурия армиясининг Россия кўмаги билан жангариларга қарши фаол жанг олиб бориши сабаб қилиб кўрсатилган. Шундан кейин элчихонада қўриқлаш масаласи кучайтирилди.
Эслатиб ўтамиз, 2016 йил декабрида Туркия пойтахти Анқарада ўша пайтдаги Россия элчиси Андрей Карлов отиб ўлдирилган. Элчини Туркия собиқ полициячиси Мавлуд Мерт Олтинтош ўлдирган. Ўшанда ҳам Башар Асад армияси Россия ҳарбийлари ёрдамида Алеппода қўзғолончи кучларга қарши жанглар олиб борган.