ЭЛЧИХОНАДАГИ НАВБАТЛАР ВА ЧАРТЕР РЕЙС: «КЎПЧИЛИК ТАНИШ-БИЛИШ, ДЕБ ЎЙЛАЙДИ. БУ ЭСА ҲАҚИҚАТГА МОС КЕЛМАЙДИ»
— Ватанга қайтишни истаган хориждаги ҳамюртларимиз чет элдаги Ўзбекистон дипломатик ваколатхоналарига мурожаат қилиши зарур. Мурожаатлар асосида дипломатик ваколатхоналар ҳузурида ташкил этилган оператив штабда рўйхат шакллантирилади. Ушбу рўйхат Ташқи ишлар вазирлигига юборилади ва умумлашган ҳолда Республика махсус комиссиясига тақдим этилади. Комиссия ушбу масалани барча йўналишда ўрганиб чиқиб, сана белгилаб, кейин қарор қабул қилади, — деди Ташқи ишлар вазири ўринбосари Эркин Ҳамроев. У рўйхат шакллантириш жараёни шаффоф бўлиши учун оператив штабда жамоат комиссияси тузилгани, унинг таркибида диаспора етакчилари, жамоат арбоблари, блогерлар, тиббиёт ходимлари ва талабалар фаол ишлаётганини таъкидлади:
— «Кўпчилик таниш-билиш, деб ўйлайди. Бу эса ҳақиқатга мос келмайди. Масалан, биргина Россиянинг ўзида 100 мингга яқин ватандош Ўзбекистонга қайтиш истагини билдирган. Бу жойда катта баҳс бўлади. Қайси категориядаги шахсларни биринчи қайтариш керак? Демак, имконияти чекланган ва қариялар, оғир касаллиги бор фуқаролар ҳамда ҳомиладор, шунингдек, ёш болали аёллар ва талабаларга устуворлик берилади».