МИБ Бухоро вилоят бошқармаси: Ҳар бир маблағ мавжуд қарздорликлар учун тақсимланган ҳолда ундирилади!
“YouTube” ижтимоий каналида «Мажбурий ижро бюроси тадбиркорларни қўллаб-қувватлаши амалда мавжудми?» сарлавҳали видеомурожаат жойлаштирилган бўлиб, унда «HANIFABONU TRANS SERVIS» масъулияти чекланган жамияти таъсисчиси Убайдов Илҳом томонидан “Ўзпарқурилиш” акциядорлик жамиятидан 1,3 млрд сўмдан ортиқ қарздорликни ундириш тўғрисидаги суд ҳужжати Мажбурий ижро бюроси Қоровулбозор тумани бўлими томонидан ундириб берилмаётганлиги, қарздорнинг хатланган мол-мулки сотувидан тушган маблағ ўтказиб берилмаганлиги, тадбиркорлик ҳуқуқларини тиклашга амалий ёрдам бериш тўғрисида билдирилган.
Мазкур хабар юзасидан ўрганиш ишлари олиб борилди ва қуйидагилар маълум бўлди.
Аниқланишича, Когон туманлараро иқтисодий судининг 2020 йил 06 март ва 01 июль кунларидаги қарздор “Ўзпарқурилиш” акциядорлик жамиятидан ундирувчи «HANIFABONU TRANS SERVIS» МЧЖ фойдасига жами 1 млрд 14 млн 800 минг сўм ундириш учун 4 та ижро ҳужжати, Ромитан туманлараро иқтисодий судининг 05.05.2020 йилдаги қарздор “Ўзпарқурилиш” акциядорлик жамиятидан ундирувчи «HANIFABONU TRANS SERVIS» МЧЖ фойдасига жами 357 млн. 400 минг сўм ундириш учун 1 та ижро ҳужжати Бюронинг Қоровулбозор туман бўлими иш юритувига келиб тушган ва ҳозирда ижро ҳаракатлари олиб борилмоқда.
Бундан ташқари, қарздорнинг 42,7 млн сўм давлат божи ундириш бўйича 6 та ва бошқа юридик шахслар фойдасига 578,6 млн. сўм қарздорликни ундириш бўйича 10 та ижро ҳужжатлари мавжуд.
Қарздорга тегишли бўлган кредит гаровидаги “ISUZU SAZ NP 26” ва “MAN TGS 26” юк автомашиналари “E-IJRO AUKSION” дастури орқали 381,5 млн сўмга сотилган ва кредит қарзини қоплаш учун йўналтирилган.
Шу билан бирга, кредит гарови сифатида бўлган ярим тиркама 35,4 млн сўмга баҳоланиб, ТИФ “Миллийбанк”га натура шаклида топширилган.
Қарздор корхонанинг “Nexia” русумли автомашинаси такрорий электрон аукцион савдоларида 41,6 млн. сўмга сотилиб, қарздор “Ўзпарқурилиш” АЖнинг ижро ҳужжатидаги давлат олдидаги қарздорлигини қоплашга қаратилган.
Ҳозирда қарздорга тегишли 432,1 млн. сўмга баҳоланган асфальт заводи биносини “E-IJRO AUKSION” дастури орқали сотувга чиқариш, майдони 50.000 м2 бўлган ғишт заводи кўчмас мулк объекти биносини баҳолаш чоралари кўрилмоқда.
Сотилган мол-мулклар «HANIFABONU TRANS SERVIS» МЧЖ ва бошқаларга Ўзбекистон Республикасининг “Суд ҳужжатлари ва бошқа органлар ҳужжатларини ижро этиш тўғрисида”ги Қонуннинг 80-моддасига асосан ундирув навбати билан кетма-кетликда солиқ ва бошқа қарзлари учун мутаносиб равишда тенг тақсимланиб ундирилади.
Ушбу хабар юзасидан жорий йилнинг 24 август куни «HANIFABONU TRANS SERVIS» масъулияти чекланган жамияти таъсисчиси Убайдов Илҳомга Бюронинг Бухоро вилоят бошқармасига таклиф этилиб, масъул ходимлар томонидан ижро ҳаракатлари ҳақида тўлиқ маълумот берилди.
Мажбурий ижро бюросининг Бухоро вилоят бошқармаси тадбиркорлик субъектларининг манфаатларини ҳимоя қилиш тарафдори ва қарздорликнинг ундирув ишлари тўхтагани йўқ!
Мажбурий ижро бюросининг Бухоро вилоят бошқармаси фаолиятига оид ҳар қандай қизиқтирган маълумотларни ёритишда – жамоатчилик ва оммавий ахборот воситалари вакиллари ҳамда блогерлар билан ҳамкорлик қилиш мақсадга мувофиқ деб ҳисоблайди.
Мажбурий ижро бюросининг
Бухоро вилоят бошқармаси