МИБ Тошкент шаҳар бошқармаси: Ишдан бўшатилган ходимлар эътирози тегишли тартибда қаноатлантирилмоқда
Жорий йилнинг 26 август куни ижтимоий тармоқларда Бюронинг Тошкент шаҳар Шайхонтоҳур туман бўлимидан бўшатилган ходимлар номидан Бюро органларида штатлар қисқарганлиги сабабли янги иш ўринларига жойлашиш муаммо бўлаётганлиги ҳамда шанба ва якшанба ишлаган кунлари учун тўлиқ ҳақ тўланмаганлиги тўғрисида хабар жойлаштирилган.
Эътирозни ўрганиш давомида қуйидалар аниқланди.
Хабарингиз бор, Президентимизнинг “Табиий газ ва электр энергиясини сотиш механизмини такомиллаштириш бўйича қўшимча чора-тадбирлар тўғрисида”ги ПФ-6010-сонли Фармонига асосан, Бюро органларида ходимларнинг штат бирликлари сони ўзгаришига олиб келган ишлар ҳажмининг қисқариши муносабати билан тегишли ходимлар Ўзбекистон Ресубликаси Меҳнат кодекси 100-моддаси 2-қисми ва 102-моддасига асосан иш берувчи томонидан меҳнат шартномаси бекор қилиниши ҳақида ёзма равишда огоҳлантирилган.
Мазкур Фармоннинг 4-бандида “Электр энергияси ва табиий газ учун тўловларнинг ўз вақтида ва тўлиқ ундирилиши бўйича вазифалар ўтказилиши муносабати билан“ Ҳудудий электр тармоқлари” ва “Ҳудудгазтаъминот” АЖларнинг тузилмалари фаолиятига қўшимча жалб қилинадиган ходимлар биринчи навбатда, мазкур банднинг тўртинчи хатбошисига мувофиқ қисқартирилаётган Бюро ходимлари ҳисобидан тўлдирилади” деб белгиланган бўлиб, хозирда Бюро рахбарияти ҳамда номлари қайд этилган таъминотчи корхоналар томонидан ўзаро ҳамкорликда амалий ишлар олиб борилмоқда.
Қисқартиришга тушган ходимлар рўйхати шакллантирилиб, шаҳар Бандлик бош бошқармаси, Тошкент “Ҳудудий электр тармоқлари” АЖ ва “Тошкент шаҳар Ҳудудгаз” МЧЖга юборилган.
Тегишли ходимларни таъминотчи корхоналар ва бошқа ташкилотларга ишга жойлаштириш бўйича доимий чоралар кўрилмоқда.
Шунингдек, махсус буйруқ билан тасдиқланган ички меҳнат тартиб-қоидаларига асосан бошқарма хамда туман бўлимларида хизмат қилаётган ходимларнинг иш вақти соат 9:00 дан соат 18:00 га қадар давом этиши, белгиланган вақтдан ташқари ишлашига шунингдек, шанба ва якшанба кунлари ишга чиқишига йўл қўйилмайди.
Ходимларнинг шанба ва якшанба кунлари ишлаши фақатгина уларнинг розилиги асосида, иш берувчининг буйруғи билан амалга оширилиши ҳамда уларга иш вақтидан ташқари, дам олиш ва байрам кунларидаги ишлари учун камида икки ҳисса миқдорида ҳақ тўланиши ёки ходимнинг хоҳишига қараб бошқа дам олиш куни (отгул) берилиши асосида амалга оширилади.
МИБ Тошкент шаҳар бошқармаси матбуот хизматининг алохида қайд этишича, ўтган даврда ходимлар томонидан меҳнат қонунчилиги бузилганлиги ва асоссиз равишда шанба-якшанба кунлари учун отгул берилмаганлиги бўйича мурожаатлар келиб тушмаган.
Бундан ташқари, меҳнат қонунчилигига асосан Бюронинг Тошкент шаҳар бошқармаси тегишли ходимларига 21.08.2020 йилда ишдан бўшатиш нафақаси тўлиқ тўлаб берилган бўлиб, Меҳнат кодексининг 151-моддасига асосан меҳнат шартномаси бекор қилиниши муносабати билан фойдаланилмаган йиллик асосий ва қўшимча таътиллар учун пуллик компенсация тўланиш чоралари кўрилмоқда.