Молдова ҳукумати истеъфога чиқди
Молдова бош вазири Наталья Гаврилица истеъфога чиқишини маълум қилди. Бу конститутсияга кўра, мамлакат Вазирлар Маҳкамасининг бутун таркиби истеъфога чиқишини англатади.
Бош вазир ўз жамоаси билан сўнгги пайтларда бир қанча мақсадларга эришганини таъкидлади. Унинг қўшимча қилишича, улар Приднестровьедаги тинч вазиятни сақлаб қолишга, қочқинлар инқирозидан чиқишга, маошларни оширишга ва Европа интеграцияси масаласида олдинга силжишга муваффақ бўлишган. «Эришилган энг муҳим нарса – Молдова Европа Иттифоқига номзод бўлди», — дея қўшимча қилди Гаврилица.
Бош вазир амалга оширилган ишлар учун барчага миннатдорчилик билдириб, бу иш давом этишига умид билдирди.