Москвада ўзбекистонлик мигрантлар иштирокида муштлашув юз берди
Москвадаги Зеленодолская кўчасидаги ресторан ёнида ўзбекистонлик мигрантлар иштирокида муштлашув юз берди. Бу ҳақда БАЗА хабар берди.
Маълум қилинишича, ҳодиса оқибатида бир киши пичоқланган, ҳодисага рўйхатдан ўтганлик ҳақидаги қалбаки ҳужжат сабаб бўлган. Ўзбекистонлик уч эркак нотаниш одамларга Россияда рўйхатдан ўтиш учун пул тўлаган. Бироқ рўйхатга олиш қалбаки бўлиб чиққан. Ўзбекистон фуқаролари нотаниш одамлардан пулни қайтариб олиш учун ресторанга келган. Томонлар ўртасидаги оғзаки тортишув оммавий муштлашувга айланиб кетган.
Ўзбекистон фуқароларидан бири қорнидан пичоқ жароҳати олган ва ресторандаги ҳожатхонада жароҳатланган ҳолда топилган. Уни у ердан шифокорлар олиб кетган. Муштлашув оқибатида полицияга 15 киши — Ўзбекистон, Тожикистон, Туркманистон фуқаролари, шунингдек, Чеченистондан беш нафар, Доғистондан уч нафар ва Кабардин-Балкариядан бир киши олиб келинган. Ўзбекистон фуқароларига Россияга кириш қоидаларини бузганлиги учун протокол тузилган.