Хоразмлик педофилларга қўшимча айбловлар эълон қилинади
Инсон ҳуқуқлари “Эзгулик” жамияти раиси Абдураҳмон Ташанов Меҳрибонлик уйи тарбияланувчиларини зўрлаган Хоразм вилояти Aдлия бошқармаси ва Янгиариқ тумани ФВВ бўлими раҳбарларига нисбатан янги айбловлар эълон қилиниши мумкинлиги ҳақида хабар берди.
Маълум қилинишича, мазкур ишни кўраётган жиноят ишлари бўйича Тошкент шаҳар суди шундай ажрим қилган. Болалар Омбудсмани қатъий назорати остидаги иш бўйича Хоразм вилояти прокуратурасига бу борада бир ойлик муддат берилган.
«Суд ажримида бошқа шахсларнинг ҳам воқеаларга алоқадорлиги масаласи кўрилиши баён қилинган. Ҳечдан кўра кеч, деганларидек ишнинг адолатли қарор топиши йўлида илк қадам ташланди. Суд иши янги айблов учун тўхтатилди.
Минг надоматки, ҳеч қандай жазо қизалоқларнинг топталган номуси, беғубор орзуларини қайтариб бера олмайди. Лекин бу ҳол кишиларда адолат ва диёнатга нисбатан йўқолиб бораётган умид нишоналарини суғорса, ажабмас», – дейди А.Ташанов.