Эртага академик лицейларга кириш тест синовлари бўлиб ўтади
2023-2024-ўқув йили учун академик лицейларга кириш тест синовлари 24-июл куни икки сменада ўтказилади. Бунда:
1 смена — 09:00 (имтиҳонга етиб келиш вақти — 07:30) да;
2 смена — 15:00 (имтиҳонга етиб келиш вақти — 13:30) да бошланади.
Талабгорлар қачон, қаерда тест синовида иштирок этишини my.edu.uz сайти орқали шахсий кабинетидан билишлари ва рухсатномани юклаб олишлари мумкин.
Талабгорлардан тест синови ўтказиладиган ҳудудга белгиланган вақтдан кечикмаган ҳолда шахсини тасдиқловчи ҳужжат ва тест синовида иштирок этиш учун рухсатнома билан келиш сўралади.
Ушбу жараёнларни шаффоф ва адолатли ўтказиш мақсадида ота-оналар ва кенг жамоатчилик учун тест синовларини исталган жойдан https://test2023.uz/ платформасида онлайн кузатиш имконияти яратилган.