Трампга қўшимча айблов эълон қилинди
АҚШ Адлия вазирлиги АҚШнинг собиқ президенти Доналд Трампга махфий материаллар билан нотўғри муомала қилгани учун қўшимча айбловлар қўйди.
Бу ҳақда Флорида жанубий округи судининг электрон маълумотлар базасига келиб тушган ҳужжатда айтилади.
“32-банд қўшилди, унга кўра, Доналд Трамп яна бир бандда – мудофаа маълумотларини ноқонуний эгаллашда айбланмоқда”, – дейилади матнда.
Бундан ташқари, ишда янги айбланувчи пайдо бўлди -– Карлос Де Оливейра. Суд материалларига кўра, у ишда иштирок этган бошқа шахс Валтер Наута билан бирга 2022 йилнинг ёзида кузатув камерасидаги ёзувни йўқ қилишга уринган. Трамп ҳам бу масала бўйича айбланувчи сифатида кўрилади.
Бундан ташқари, Де Оливейра ёлғон кўрсатма берганликда ва Наутага махфий ҳужжатлар қутиларини АҚШ маъмурияти собиқ раҳбарининг мулкига кўчиришда ёрдам берганликда айбланмоқда.