Ливия Туркияга Ҳомс портини ижарага беришини рад этди
Ливия Миллий Бирлик Ҳукумати (ГНУ) Туркия Ливияда ҳарбий база яратиш учун Ҳомс портини ижарага олгани ҳақидаги маълумотни расман рад этди. Тегишли баёнотни ГНУ расмий вакили Муҳаммад Ҳаммуда, портлар ва денгиз транспорти бошқармаси бошлиғи Муҳаммад ал-Сиви ва денгиз флоти бошлиғи Нуриддин ҳамроҳлигида Ҳомс портида сўзлаган.
Ҳаммуда журналистларни “Ливия жамоатчилик фикрини ғазаблантирмаслик” учун маълумотларнинг тўғрилигини синчиклаб текширишга чақирди.
Ал-Сиви “қўшни давлатлар билан савдо айланмасини ошириш ва унинг Ливия иқтисодиётини ривожлантиришдаги ролини кучайтириш мақсадида портни ривожлантириш режаси борлигини” таъкидлади.
Аввалроқ Туркия ОАВлари Туркия Ливиядаги Ҳомс портини 99 йилга ижарага олгани ва у ерда ҳарбий базани жойлаштириши ҳақида хабар берган эди. Туркия расмийлари бу хабарларга ҳозирча изоҳ бермаган.