Ўзбекистоннинг ҳайдовчилик гувоҳномалари энди БААда ҳам тан олинади
2 декабрь куни Абу-Даби шаҳрида Ўзбекистон ички ишлар вазири Пўлат Бобожонов бошчилигидаги делегация Бирлашган Араб Амирликлари бош вазири ўринбосари – ички ишлар вазири Шайх Сайф бин Зоид Ол Наҳаён билан учрашди.
ИИВ матбуот хизмати учрашувда «Ўзбекистон Республикаси ҳукумати билан Бирлашган Араб Амирликлари ҳукумати ўртасида ҳайдовчилик гувоҳномаларини ўзаро тан олиш ва алмашиш тўғрисида»ги англашув меморандуми имзоланганини маълум қилган.
Таъкидланишича, мазкур меморандум кучга кириши билан ҳар икки давлат фуқаролари ўзларининг миллий ҳайдовчилик гувоҳномалари билан иккинчи томон давлатининг ҳудудига ташриф буюрган даврда (узоқ муддатга яшаш учун келганлар бундан мустасно) транспорт воситаларини бошқариш ҳуқуқига эга бўлади.
Шунингдек, БАА резиденти бўлган (узоқ муддатга яшаш ҳуқуқини олганлар) миллий ҳайдовчилик гувоҳномасига эга Ўзбекистон фуқаролари БАА ҳайдовчилик гувоҳномасини олиш вақтида тегишли назарий ва амалий синовларни топширишдан озод қилинади.
Ҳужжат 2024 йилнинг 27 январидан кучга кириши белгиланган.
Шунингдек, ички ишлар вазирларининг учрашувида томонлар трансмиллий уюшган жиноятчилик, терроризм, экстремизм, одам савдоси ва кибержиноятларга қарши биргаликда курашиш, мазкур йўналишларда ходимларнинг малакасини ошириш ва ўзаро тажриба алмашишни муҳокама қилинган.
2015 йилдан декабрдан Ўзбекистон томонидан берилган ҳайдовчилик гувоҳномаларни Жанубий Кореяда ҳам тан олиниши ҳақидаги келишув кучга кирганди.