Җылы су краныннан кайнар су акмаса, кем гаепле һәм нишләргә?

Кайнар суны яңадан бирә башлагач, ул күпме вакыт җылымса гына булырга мөмкин? Бу нормативларда билгеләнгәнме? Әлеге сорауларга Татарстан торак инспекциясе матбугат хезмәтендә аңлатма биргәннәр. Бу турыда «Челнинские известия» яза.

«Кайнар су үрнәген алыр алдыннан, суны 3 минуттан да артык агызырга кирәкми. Су торбаларда тора һәм суына – шуңа күрә бу агызып тору кирәк. Норматив буенча краннан аккан суның температурасы +60 градустан түбән һәм +75 градустан югары булмаска тиеш. Әгәр түбәнрәк булса – куркыныч бактерияләр барлыкка килергә мөмкин, ә югарырак булса – пешү куркынычы һәм су белән тәэмин итү системасының тизрәк тузуы бар», – дип аңлаттылар Торак инспекциясендә.

Ведомство хәбәр иткәнчә, су кайнар булмауның төрле сәбәпләре булырга мөмкин: сантехниканы дөрес тоташтырмау, мәсәлән, гигиеник душ яки бойлер, су бүлү системасының тыгылуы (гомуми торбадан фатирга кергән бүлектә). Әгәр торба томаланган булса, басым булмый, һәм су суына. Бу очракта җаваплылык хуҗага йөкләнә.

«Әгәр температура нормативка туры килмәсә, идарәче компаниягә гариза бирергә кирәк. Белгечләр килергә, карарга, акт төзергә тиеш. Актта температура төшү сәбәбе күрсәтелергә һәм чаралар күрелергә тиеш. Әгәр су кайнар булмау идарәче компания гаебе белән бәйле булса, кулланучыга кайнар су хезмәте өчен түләүне киметергә тиешләр, – диделәр ведомствода. – Су температурасы нормадан түбән яки югары булган очракта, хезмәт тиешле сыйфатта булмау сәбәпле, һәркем түләүне яңадан исәпләтү хокукына ия».

Әгәр кайнар су бары тик +40 градус кына булса, түләү салкын су бәясеннән исәпләнергә тиеш.