Гөлнара Тимерҗанова җырын башкаручылар турында: «Яшьләрнең мәгънәсезлегенә шаккаттым»
Гөлнара Тимерҗанова һәм яшь җырчылар Вилли белән Рузилә арасында җыр бүлешү буенча аңлашылмаучылык килеп чыкты. Шул уңайдан блогер Олеся Лесная Гөлнара Тимерҗанова белән әңгәмә корган.
– Гөлнара апа, исәнмесез, хәерле көннәр!
– Хәерле көннәр.
– Бүген сезгә 1-2 сорау бирәм инде.
– Бер-икене генә түгел, бишне бирсәң була.
– Соңгы елларда, бер 10 еллап, сез югалдыгыз. Нәрсә белән бәйле ул?
– «Югалдыгыз» дип «үтерәсез» инде! Югалмадым! Ел саен клипларым, җырларым чыгып торды. Акча өчен түгел, күңел халәтем өчен эшләдем. Популяр җырчы булу – бер көнлек ул, ә билгеле җырчы булу – ул бик зур әйбер. Билгеле булырга кирәк яшьләргә.
– Соңгы көннәрдә татар эстрадасында бер җәнҗал булды. Вилли белән Рузилә исемле җырчылар сезнең җырны яңартып башкардылар. Ачыклык кертегез әле.
– Минем белән очраштылар алар. Гафу үтенделәр. Тегесе бөтенләй килергә курыккан. Алар «без белмәдек» диләр. Бу эшне килешеп тәмамларга телиләр, ә без уйлыйбыз әле. Миңа алардан акча кирәкми, минем җырга бөтенләй тимәсеннәр. Беренче көннән үк «социаль челтәрдән алып атыгыз» дидем – тыңламадылар. Мин ул егетне белми идем, ул гел елмаеп тора, балкый. «Без сезнең җырны популяр дип уйламадык, яхшы җыр», – дип тора.
Балакаем, бу – классик җыр бит. Аны теләсә ничек – арт якларны болгап җырларга ярамый. Бу – бары тик минем өчен язылган җыр. Миңа 60-70 яшь булганда, мин җырларымны үзем бирәчәкмен. Ул һәр җырчыга сабак булырга тиеш.
– Бу – махсус пиар булмады?
– Юк, мин шундый оятсыз кеше түгел бит. Бу – кемгәдер нормаль күренеш. Имештер, күтәрелеп китәргә шундый әйбер уйлап чыгару.
– Нишләп сез, башка артистлар кебек, социаль челтәрләрне актив алып бармыйсыз?
– Дөресен әйткәндә, мин – ирсез хатын. Баламны үзем карыйм, түгәрәкләргә үзем йөртәм. Гастрольләргә чыгып китәм, администраторым юк. Вакытым җитми.
– Җырдан кала тагын ничек акча эшлисез?
– Җыр белән генә. Ышанмыйсызмы? Кая чакырсалар шуннан алып кайткан акча шул ук көнне бетә. Мин дөнья кумыйм, минем миллардларым юк.
– Банкетларда ничә сумга җырлыйсыз?
– Төрлечә. Болай 30 мең сумнан башлана…
Бу җыр мәсьәләсе чыккач, кан басымым күтәрелде. Мин «юк» дип тордым, алар шулай эшләгәч, яшьләрнең мәгънәсезлегенә шаккаттым.
Виллига «басып торасың яшь нарат кебек» дим, әле «Гөлнара апа» дип кулларымнан тотты, аның куллары шундый йомшак….