Минтимер Шәймиев Татарстан Рәисе каршындагы Совет утырышында: Республиканың киләчәге якты

Татарстан узган үсеш юлы канәгатьләнү хисе тудыра. Проблемалар һәрвакыт булды һәм булачак, әмма безнең төбәк аларны җиңеп чыгарга сәләтле. Бу хакта бүген Казан Кремлендә Татарстан Рәисе каршындагы Милләтара һәм динара мөнәсәбәтләр советы утырышында ТР Дәүләт Киңәшчесе Минтимер Шәймиев хәбәр итте, дип яза «Татар-информ».

Очрашуда катнашучылар Россия Федерациясенең 2025 елга кадәрге Дәүләт милли сәясәте стратегиясен Татарстанда гамәлгә ашыру нәтиҗәләре һәм 2036 елга кадәрге яңа стратегиянең бурычлары турында фикер алышты. Утырышны Татарстан Рәисе Рөстәм Миңнеханов үткәрде.

«Бу елларда катлаулы юл үтәбез. Без генә түгел, гомумән, мин Россия Федерациясенең һәм Россиянең күпмилләтле халкының яңа шартларда формалашуын күздә тотам», – дип билгеләп үтте үзенең чыгышында Минтимер Шәймиев.

ТР Дәүләт Киңәшчесе фикеренчә, төбәккә барлык кискен мәсьәләләрне уңышлы үтәргә насыйп була.

«Әгәр без менә шулай сабырлык белән, халык тавышына колак салып, алга таба да яшәсәк һәм эшләсәк, нәтиҗәләр булачак», – диде Шәймиев.

Ул өстәп әйткәнчә, Татарстанның киләчәге зур.

«Без хәзер республиканың уңышка ирешәчәгенә ышана алабыз, чөнки без эшли беләбез, мөмкинлекләребез, ресурсларыбыз, халкыбыз, күпмилләтле халык бар. Шуңа күрә, катлаулы үзгәртеп кору елларын үткәннән соң, билгеле бер тәҗрибә туплагач, хәзер аны ныгытырга кирәк», – дип искәртте Шәймиев.

Ул шулай ук Татарстанда яшәүче барлык милләт вәкилләренең дә тигез булуын әйтте. «Шундый үзара аңлашу булганда, күңел сөенә. Сабырлык кирәк, бер-береңне һәм республиканы яратырга кирәк», – диде Шәймиев.