Ишегалдын кардан кем чистартырга тиеш?

ТР Дәүләт торак инспекциясе карны һәм бозларны чистарту мәсьәләсенә ачыклык кертә. Территорияне кем чистартырга тиешлеген ничек ачыкларга? Иң мөһиме – бу территориянең кемнеке булуын аңлау.

Ишегалды һәм йорт янындагы тротуар. Әгәр сез күпфатирлы йортта яшисез икән, кар, түбәләрдәге һәм тротуарлардагы бозларны җыештыру өчен сезнең идарәче компания (УК) яки Торак милекчеләре ширкәте (ТСЖ) җаваплы. Бу – аларның турыдан-туры бурычы.

Шәһәр урамнары һәм юллары. Шәһәр урамнарын, йорт яны территориясенә кермәгән тротуарларны һәм юлларны кардан һәм боздан чистарту өчен, шәһәр коммуналь хезмәтләре җаваплы. Подрядчылар ялланса да, чисталыкны шәһәр коммуналь хезмәтләре күзәтә.

Кибет яки офис янындагы территория. Әгәр бу – шәхси предприятие яки оешма булса, карны чистарту өчен аларның хуҗасы җаваплы.

Шәһәр юллары: Шәһәрнеке (муниципаль) булган юллар өчен җирле хакимият органнары җавап бирә.

Ишегалдындагы карны җыештырмасалар нишләргә? Татарстанның Торак инспекциясенә мөрәҗәгать итегез.