Кытай автомобильләренең өстенлекләрне һәм җитешсезлекләре – белгеч фикере
Кытайда җитештерелгән машиналарның өстенлеге подвескасында һәм запчастьләрнең бәясе үтемле булуында, тик, шул ук вакытта, аларның коррозиядән сакланышы түбән һәм электроникасы бик үк ышанычлы түгел. Бу хакта автоэксперт, Россия Хөкүмәте каршындагы юл хәрәкәте иминлеге комиссиясе әгъзасы Дмитрий Попов сөйләде, дип яза «Татар-информ».
«Үземнең Кытай машинасында 1 елда 50 мең километр уздым. Подвескасы яхшы булуны аерым әйтәсе килә, подвескада мондый энергия сыйдырышлылыгын күптән очраткан булмады. Тик органайзингка бәйле сораулар бар. Кытай машиналарының күбесендә тачскриннар бар, алар исә салкын һава торышы булганда еш кына уңайсызлык тудыра. Моннан тыш, салон эчендәге ут сүлпән, арткы урыннарда розеткалар, прикуривательләр юк. Әмма кайбер җитештерүчеләр бу проблемаларны хәл иткән», – дип сөйләде ул.
Шулай ук кытай машиналарында коррозиягә каршы торуда һәм детальләрне алмаштыруда проблемалар бар. Арзан булуына да карамастан, еш кына аларны алмаштыру механик яктан катлаулы. Мәсәлән, алгы фараның лампочкасын алыштыру өчен, капот астында берьюлы берничә зур блокны алырга кирәк, бу – уңайсызлык тудыра, дигән Попов.
«Тагын алгы амортизатор терәкләренә кагыла торган мөһим момент бар. Алар кечкенә почмакларга куелган, шуның аркасында машина борылганда каршы якка чүгә. Шуңа күрә идарә итүчәнлек кими», – диде ул.
Эксперт, тагын бер җитешсезлек буларак, кытай машиналарының күпчелегендә вариатор конструкциясен атады. Аны сүтеп булмый, шуның аркасында, ул ватылган очракта, бөтен системаны алмаштырырга кирәк була. Ә ул якынча 200 мең километрга гына чыдый.
Яңа Кытай автомобиле алыргамы, тотылган Европа яки Япония машинасы алыргамы, дигән сорауга, Попов, Кытай запчастьләре хәзер безнең ил өчен тулы һәм үтемле, диде.
«Монда бер генә төрле җавап юк. Куллану ягыннан караганда, һәр автомобиль үзен вакыт узу белән күрсәтә. Тик шуны аңларга кирәк, хәзер базар сүтелгәннән калган запчастьләр белән эшли, ә алга таба нәрсә буласын әйтү авыр», – диде Попов.
Тик ул үз позициясенә тугры кала: тотылган автомобиль алганчы, яңаны алу яхшырак.
«Яңа автомобиль – яңа инде ул. Бүгенге вазгыять шундый: безнең ил өчен базарда иң үтемле һәм шактый ышанычлы булып «кытайлар» кала. Шулай итеп, мин тотылган Европа яки Япония машинасы урынына яңа автомобиль сайладым», – дип йомгаклады агентлык әңгәмәдәше.