Ришат Төхвәтуллин: «Бу – зарлану түгел, әмма...»
Татарстанның халык артисты Ришат Төхвәтуллин, якын дусты, эшмәкәр Ильяс Гимадутдиновны югалтканнан соң, тормышның һәм вакытның кадере турындагы фикерләре белән уртаклаша.
«Дуслар, Ильясны югалтканнан соң, тагын да ныграк бер әйберне аңлый башладым… Шулай чабып йөрибез, дөнья, мал куабыз, өйгә кайтып кермибез… Улым Алим белән буласы килә, әти-әни, туганнар белән. Рәхәтләнеп мунча кереп, сөйләшеп утыру урынына, гел каядыр чабасың. Тегесе дә кирәк, монысы да…
Бу – заралану түгел, әмма гомер узып бара. Яшәргә дә онытмаска иде. Һәрбер нәрсәнең үз вакыты, яшь вакытта йөреп тә, әмма яшәп тә калырга кирәк. Исән булыйк – иң мөһиме.
Элек мондый темаларга бик уйланганым юк иде. Яши-яши кыйммәтләр, күзаллаулар үзгәрә. Мин дә олыгаямдыр», – дип, уйлары белән яза ул телеграм-каналында.