Ильмира Нәгыймова: «Мин алиментка бирергә булдым. Беләм, инде күптән кирәк иде»
Ильмира Нәгыймова Руслан Кираметдиновны алиментка биргән. Бу хакта җырчы язылучыларыннан килгән сорауларга җавап биргәндә әйткән. Артист сүзләренчә, аның элекке ире, җырчы Руслан Кираметдинов балалары белән аралашмый һәм аларга финанс ярдәме күрсәтми.
«Дүрт елга беренче тапкыр мин алиментка бирергә булдым. Беләм, инде күптән кирәк иде. Ләкин әти кеше буларак хисләре нәфрәттән көчлерәктер дип уйлаган идем. Әмма...», – дип язды ул бу хакта сторисларында.
Моннан ике ел элек Ильмира: «Мин алиментка да бирмәдем, иң мөһиме – миңа тимәсен генә. Финанс яктан бернинди ярдәм юк. 2 ел буе. Әбиләре 2 атнага 1 алып китә, балаларның күңеле булып кайта, миңа шул җитә. Бәлки, миңа үч итеп, финанс ягыннан ярдәм итәсе килмидер. Мөмкинлеге юктыр, дип уйлыйм, кайвакытта жәлләп тә куям. Аллаһка шөкер, Аллаһ Тәгалә миңа бирә бит. Сорый торган дәрәҗәгә калырга язмасын», – дип сөйләгән иде.
Ильмира Нәгыймова белән җырчы Руслан Кираметдинов дүрт ел элек аерылышты. Аларның 2 балалары үсә – Камил һәм Ясминә.