2025 елда иң яхшы галим исемен яулаган Кев Салиховны Рөстәм Миңнеханов бүләкләде
Казанда Бәшир Рәмиев исемендәге IT-паркта «Фәнни алга китеш» премиясе лауреатларын бүләкләделәр. «Иң яхшы галим» номинациясендә физика-математика фәннәре докторы, Россия Фәннәр академиясенең Казан фәнни үзәгенең Евгений Завойский исемендәге КФТИ фәнни җитәкчесе, Татарстан башкаласының Мактаулы гражданины, Россия Фәннәр академиясе академигы Кев Салихов җиңде.
Төп бүләкне Кев Салиховка Татарстан Рәисе Рөстәм Миңнеханов тапшырды. Бу турыда «Татар-информ» яза.
«Бүген галимнәребезне хөрмәтлибез. Татарстанда фәнни эшчәнлекне стимуллаштыруның төбәк инструментларын формалаштыру, дөнья дәрәҗәсендәге алдынгы инженерлык мәктәпләрен төзү проекты, торак шартларын яхшырту программасы һәм башкалар буенча эш дәвам итә. Мондый практикалар илнең фәнни сәясәтенең нәтиҗәлелеген арттыруга ярдәм итә һәм башка регионнарда сынау өчен тәкъдим ителә ала», – дип белдерде Татарстан Республикасы Рәисе Рөстәм Миңнеханов.
«Фән – ул зур ресурс. Мине Татарстанда, шул исәптән җитәкчелекнең, һәрвакыт фәнне хуплавы илһамландыра. ТР Фәннәр академиясе төбәкләр арасында иң хөрмәтле академиягә әверелде. Эшкә мондый мөнәсәбәт булганда без уңышка ирешми кала алмыйбыз», - диде Салихов.