Журналист Мөршидә Кыямовага мактаулы исем бирелде
Байтак еллар «Интертат» электрон газетасында эшләгән журналист, хәзер «Гаилә һәм мәктәп» журналының җаваплы сәркатибе Мөршидә Кыямовага Татарстан Республикасы Рәисе Рөстәм Миңнеханов Указы белән «Татарстанның атказанган матбугат һәм массакүләм мәгълүмат чаралары хезмәткәре» дигән мактаулы исем бирелгән.
Әлеге Указ белән бу мактаулы исемне тагын ике журналист – «Татмедиа» агентлыгы филиаллары хезмәткәрләре - «Әтнә таңы» газетасының баш мөхәррире Гөлнар Мөхәммәтҗанов һәм «Саба таңнары» газетасы корреспонденты Фәридә Вилданова алган. Каләмдәшләребезне котлыйбыз!
- Мөршидә Кыямова төрле елларда «Казан радиосы»нда, «Мәгърифәт» студентлар газетасында, «Интертат» электрон газетасында, «Идел» журналында эшләде. Ул танылган тележурналист, алып баручы, шагыйрь, җырчы, Татарстанның атказанган сәнгать эшлеклесе Илдар Кыямовның хатыны, журналист, актер һәм алып баручы, Татарстанның атказанган артисты Идел Кыямовның һәм яшь язучы һәм журналист Ихтыяр Кыямовның әнисе.