გიორგი ბარამიძე: ჩვენი კონკრეტული მოთხოვნებია: ვადამდელი არჩევნები, პოლიტპატიმრების გათავისუფლება …
„ერთიანი ნაციონალური მოძრაობის“ ერთ-ერთი ლიდერის გიორგი ბარამიძის განცხადებით, ოპოზიციის მოთხოვნა არა პლებისციტი, არამედ ვადამდელი საპარლამენტო არჩევნებია.
მან საქართველოს მესამე პრეზიდენტის მიხეილ სააკაშვილის განცხადება შეაფასა, რომლის თქმით, ქვეყანას სჭირდება არა პლებისციტი, არამედ რიგგარეშე არჩევნები.
„ჩვენი მოთხოვნა არაერთხელ გამოქვეყნებულა და თქვენც გაგიშუქებიანთ. ჩვენი კონკრეტული მოთხოვნებია: ვადამდელი არჩევნები, პოლიტპატიმრების გათავისუფლება, ახალი ცენტრალური და ადგილობრივი კომისიების ადმინისტრაციები და ნორმალური კანონმდებლობა. ევროკავშირის უმაღლესმა თანამდებობის პირმა, ევროპული საბჭოს პრეზიდენტმა შარლ მიშელმა კიდევ დაამატა ამას ორი პუნქტი, მათ შორის არის საქართველოში ნორმალური, მიუკერძოებელი სასამართლო. შესაბამისად, არაფერი იცვლება. თუ ხელისუფლება კომპრომისის მიმართულებით გადადგამს ნაბიჯებს, გამოუშვებს პოლიტპატიმრებს და დანიშნავს ვადამდელ არჩევნებს, ბუნებრივია, ოპოზიციის მხრიდანაც იქნება გარკვეული კომპრომისების გადადგმის აუცილებლობა, შემდეგ შეიძლება ვილაპარაკოთ ნებისმიერ სხვა საკითხზე. დღემდე იყო, არის და რჩება კონკრეტული მოთხოვნა არა პლებისციტი, არამედ ვადამდელი საპარლამენტო არჩევნები“, – განუცხადა ბარამიძემ ჟურნალისტებს.
ცნობისთვის, საქართველოს მესამე პრეზიდენტის მიხეილ სააკაშვილის განცხადებით, არავითარ შემთხვევაში არ შეიძლება პლებისციტის მოდელზე დათანხმება. მისი თქმით, ქვეყანას სჭირდება არა პლებისციტი, არამედ რიგგარეშე არჩევნები.