ჟურნალისტი, პუბლიცისტი ოლეგ პანფილოვი გარდაიცვალა
66 წლის ასაკში გარდაიცვალა ჟურნალისტი, პუბლიცისტი და მწერალი ოლეგ პანფილოვი. ამის შესახებ მისი მეუღლე ოქსანა მასლაკი იტყობინება.
პანფილოვი დაიბადა ტაჯიკეთში. მოღვაწეობდა რუსეთში, სადაც ის იყო ჟურნალისტთა დაცვის კომიტეტის მოსკოვის ბიუროს ხელმძღვანელი, რუსეთის ჟურნალისტთა კავშირის ექსტრემალური ჟურნალისტიკის ცენტრის დირექტორი.
2008 წლის სექტემბერში მიიღო საქართველოს მოქალაქეობა. 2009 წლიდან ცხოვრობდა საქართველოში, იყო ილიას სახელმწიფო უნივერსიტეტის პროფესორი. 2012 წლამდე მუშაობდა საქართველოს მაშინდელი პრეზიდენტის მიხეილ სააკაშვილის ინიციატივით შექმნილ რუსულენოვან „პირველ კავკასიურ“ არხზე.
“საქართველოში ჩემი გადმოსვლის მთავარი მიზეზი რუსეთში ბოლო დროს შექმნილი სიტუაციაა. როცა ქვეყანაში არ არსებობს სიტყვის თავისუფლება, ობიექტური ინფორმაცია და ხალხს ეშინია თავისუფლად აზრის გათქმის, დიახ, ეს პოლიტიკას უკავშირდება”, – ამბობდა პანფილოვი და აღნიშნავდა, რომ მას რუსეთში ინტერნეტით ემუქრებოდნენ.
“ადამიანები გამოხატავდნენ ზიზღს ჩემ მიმართ, როცა საქართველოს ვიცავდი; ქვეყნის მტერს მეძახდნენ, როცა ვამბობდი, რომ 2008 წლის ომი რუსული აგრესია იყო. მიუღებელია საბჭოთა კავშირის აღდგენაზე ფიქრიც კი, იმპერიალიზმი დემოკრატია ნამდვილად არ არის”, – ამბობდა პანფილოვი.
მოგვიანებით, მან სტატიების კრებულიც გამოსცა – ანტისაბჭოთა ისტორიები.