ელენე ხოშტარია: „ქართული ოცნება” მორიგი ანტიევროპული და ანტიდასავლური კანონის დარეგისტრირებისთვის პასუხს მიიღებს
კოკა მორგოშია კი არ არის საინტერესო – საინტერესოა და მნიშვნელოვანია „ქართული ოცნების“ პოზიცია, რომელიც დღეს მორიგი ანტიევროპული და ანტიდასავლური კანონის დარეგისტრირებას გეგმავს, რომელზეც აუცილებლად პასუხს მიიღებს, – ამის შესახებ პარტია „დროას“ ლიდერმა, ელენე ხოშტარიამ განაცხადა, რითაც ის „კონსერვატიული მოძრობის“ ლიდერებისა და ტელეკომპანია „ალტ-ინფოს“ წამყვანების ავტორობით მომზადებულ კანონპროექტებს გამოეხმაურა.
მისივე თქმით, აღნიშნული კანონპროექტი ევროკავშირის წევრობის კანდიდატის სტატუსის პირდაპირი და მორიგი საბოტაჟია.
„ალტ-ინფოს“ კანონპროექტი, ეს არის პირდაპირი და მორიგი საბოტაჟი ჩვენი ევროპული კანდიდატობის სტატუსის. ეს საბოტაჟი თავის დროზე გვარამიას დაჭერით არ გამოუვიდათ. ასევე, ეს საბოტაჟი „რუსული კანონით“ არ გამოუვიდათ, მათ დიდი წინააღმდეგობა მიიღეს და ზუსტად იმავეს ამ „ალტ-ინფოს“ რუსულ კანონზე მიიღებენ, რომელიც ჩვენი ქვეყნის ევროპულ მომავალს ანგრევს.
კოკა მორგოშია არის მოძალადე, რუსეთისგან დაფინანსებული, რომელსაც „ქართული ოცნება“ მფარველობს. მამუკა მდინარაძემ პირდაპირ თქვა, რომ მიზანშეწონილი არის მსგავსი კანონის განხილვა, რომელსაც ლობირებს, წერს და ამისთვის პირდაპირ ხალხს ქუჩაში ურტყამს, მათ შორის ჟურნალისტებს. კოკა მორგოშია კი არ არის საინტერესო, საინტერესო და მნიშვნელოვანია „ქართული ოცნების“ პოზიცია, რომელიც დღეს მორიგი ანტიევროპული და ანტიდასავლური კანონის დარეგისტრირებას გეგმავს, რომელზეც აუცილებლად პასუხს მიიღებს“, – განაცხადა ხოშტარიამ.