რომან გოცირიძე: ფაქტობრივად, ივანიშვილმა მოპარა ფული ხალხს და ახლა უჩივის თავის პარტნიორს
„ფაქტობრივად, ივანიშვილმა მოპარა ფული ხალხს და ახლა უჩივის თავის პარტნიორს – მისი ბიტკოინების საწარმოები პარაზიტებია ქვეყნის ეკონომიკისთვის,“ – ასე ეხმაურება დეპუტატი, ეროვნული ბანკის ყოფილი პრეზიდენტი რომან გოცირიძე „ფეისბუქის“ პირად გვერდზე „ქართული ოცნების“ დამფუძნებლის, ბიძინა ივანიშვილის კრიპტოვალუტის მითვისების საქმეზე თანაინვესტირების ფონდის ყოფილი ხელმძღვანელის გიორგი ბაჩიაშვილის მიმართ სისხლის სამართლებრივი საქმის დაწყებას.
მის პოსტს უცვლელად გთავაზობთ:
„ბიტკოინების საწარმოები, რომლებიც ბიძინა ივანიშვილმა ააშენა საქართველოში, განთავსებულია სპეციალურად მისთვის შექმნილ თავისუფალ ინდუსტრიულ ზონაში. ისინი არ იხდიან ბიუჯეტში არცერთ გადასახადს, გარდა იქ დასაქმებული ასიოდე ადამიანის საშემოსავლო გადასახადისა. საწარმოები დიდძალ ელექტროენერგიას იღებენ შეღავათიან ფასად, არ იხდიან დღგ-ს. რომ არა ეს პრივილეგიები, ისეთ ცხელ ქვეყანაში, როგორიც საქართველოა, მათი მუშაობა იქნებოდა წამგებიანი.
ივანიშვილის მიერ შექმნილი საწარმოები პარაზიტებია საქართველოს ეკონომიკურ სხეულზე. ფაქტობრივად, მან მოპარა ფული ხალხს და ახლა უჩივის თავის პარტნიორს, რომ თავად მას მოპარეს ბიტკოინები, რომლის ღირებულება თურმე 39 მილიონ დოლარს უდრის.
მისი ფონდის ხელმძღვანელზე 8 წლის წინ გაცემული და დაბრუნებული სესხის გამო საქმის აღძრვა, პასპორტების ჩამორთმევა და მძევლად აყვანა სერიოზულ ეჭვებს ბადებს,“-წერს გოცირიძე.