რუსეთში მეუღლის ბიზნესსაქმიანობაში მხილებული ესტონეთის პრემიერი კაია კალასი ამ თემაზე განმარტებას აკეთებს
ესტონეთის პრემიერ-მინისტრი კაია კალასი აცხადებს, რომ მან თავისი მეუღლისა და მისი ბიზნესპარტნიორის რუსეთში საქმიანობის შესახებ 21 აგვისტოს შეიტყო და აღნიშნავს, რომ დასამალი არაფერი აქვს.
კალასის თქმით, მეუღლის კომპანია Stark Logistics, რუსეთში საქმიანობას სექტემბერში დაასრულებს. ამის შესახებ ინფორმაციას ესტონეთის საზოგადოებრივი მაუწყებელი ავრცელებს.
„მე ყოველთვის ვცდილობდი, ჩემი სამუშაო და ოჯახური ცხოვრება გამემიჯნა. სამწუხაროდ, ახლა ისინი ერთმანეთს დაემთხვა. ეს ეხება ჩემი ქმრის ბიზნესპარტნიორის საქმიანობას. მე არ მაქვს კავშირი ჩემი მეუღლის ბიზნესპარტნიორთან (არვო ჰალიკთან) და არც დეტალური ინფორმაცია, მისი ბიზნესსაქმიანობის შესახებ“, – განაცხადა კაია კალასმა.
ესტონეთის საზოგადოებრივმა მაუწყებელმა, ERR-მა მიმდინარე კვირაში გაავრცელა ინფორმაცია, რომ სატრანსპორტო კომპანია Stark Logistics, რომლის წილის მფლობელი პრემიერ-მინისტრის, კაია კალასის მეუღლე არვო ჰალიკია, უკრაინაში ომის დროს, რუსეთში ბიზნეს საქმიანობას აგრძელებდა.
კალასის თქმით, მის მეუღლეს არ ჰყავს რუსი კლიენტები და მის მიერ მიღებული ინფორმაციის თანახმად განმარტავს, რომ ეს კომპანია უკრაინაში ომის დაწყებამდე რუსეთში ლოგისტიკურ მომსახურებას ეწეოდა, რაც 2022 წლის მარტში შეწყვიტა, თუმცა ამჟამად რუსეთში ერთ ესტონურ კომპანიას უწევს მომსახურებას და ეს პროექტი ასევე დასკვნით ეტაპზეა.
ამასთან, ესტონეთის პრემიერ-მინისტრი ხაზს უსვამს, რომ Stark Logistics-ს სანქციები არ დაურღვევია.
„თქვენ შესაძლოა, მკითხოთ, რა დამოკიდებულება მაქვს ამ საქმიანობის ეთიკურ ასპექტთან? მე აქამდეც მითქვამს და კიდევ ერთხელ ვიტყვი: კვლავ მჯერა, რომ ყველა სახის ბიზნესი რუსეთთან უნდა შეწყდეს, ვიდრე უკრაინაში რუსეთის აგრესია გრძელდება. რამდენადაც ვიცი, ეს არის ის, რაც ჩემმა მეუღლემ გააკეთა ომის დაწყებიდან ერთ თვეში“, – განაცხადა კალასმა.
მოგვიანებით, კაია კალასმა თქვა, რომ გადადგომას არ აპირებს, რადგან, როგორც თავადვე აღნიშნავს, საამისოდ არაფერი ცუდი არ ჩაუდენია.