ნანა დოლიძე: ნიტროფირი კი არა ისტორია დაიწვა …
“არქივში ნიტროფირები დაიწვა, არ ვიცი რამდენი და რა საფილმო მასალა, თუმცა თითოეული კადრი რომ გასული საუკუნის ისტორიას ინახავდა, ესეც ფაქტია. ამიტომ, ნიტროფირი კი არა ისტორია დაიწვა …
ერთად თავმოყრილი ნიტროფირები ფეთქებადსაშიშია, თვითაალებადია, არც ჟანგბადი ჭირდება რომ აალდეს, წამებში იწვის, ცეცხლის გაჩენის შემთხვევაში ვერც მოასწრებ მის ჩაქრობას. ამიტომ არის განსაკუთრებული რეჟიმი და დიდი ძალისხმევა საჭირო მის შესანახად. არქივის სპეციალისტებმა ეს ნიუანსები ზედმიწევნით იციან და თუ კი სადმე იცავდნენ, სწორედ აქ, ამ არქივში იცავდნენ. მაგრამ პრობლემა, ამგვარი მასალის ქალაქის ცენტრში არსებობაა, ის რომ დღემდე ვერ მოხერხდა არქივის აშენება და მთელი ვიზუალური მემკვიდრეობის სპეციალურ საცავებში განთავსება.
ფაქტი ერთია, რომ დედნები აღარ არის და მხოლოდ მისი ციფრული ასლები გვაქვს, ისიც ცალკეული ადამიანების დამსახურებით. სწორედ ეს “ციფრი” საჭიროებს ახლა ისევ თანამედროვე ფირზე გადატანას, ისტორია რომ სულ არ დავკარგოთ.
ხანძარმა უკვე მეორედ შეიწირა კინომემკვიდრეობა.
2005 წელს კინოსტუდიაში გაჩენილ ხანძარს შეეწირა ქართული ფილმები, მათ შორის ფონოგრამებიც, რის გამოც ბევრი ჩვენი ფილმის ქართულენოვანი ფონოგრამა პრობლემად რჩება.
ახალი არქივის მშენებლობაც ვერ გადაწყვეტს ამ პრობლემას, იმდენად კომპლექსურია. ფაქტი ერთია, რომ რუსეთის საცავების იმედად არ უნდა დავრჩეთ.
მაშინაც და ახლაც ეს იყო სწორედ სახელმწიფოს საფიქრალი და ესეც ამ დიდი პრობლემის მხოლოდ ნაწილია,” – წერს სოციალურ ქსელში კინომცოდნე ნანა დოლიძე.
ცნობისათვის, ეროვნული არქივის ეზოში მდებარე ნაგებობაში, რომელსაც გუშინ ხანძარი გაუჩნდა, ძველი კინოფირები ინახებოდა. ეროვნული არქივის საზოგადოებასთან ურთიერთობის სამსახურის განცხადებით, საცავში განთავსებული ყველა ფირი გაციფრულებულია და მათი ასლები კინოარქივში ინახება.