Кинофестиваль çывхарать
Йăлана кĕнĕ халăхсем хушшинчи Шупашкарти кинофестиваль Чăваш Енре çу уйăхĕн 26-мĕшĕнче пуçланать. Эрнене тăсăлакан, шучĕпе 16-мĕш хут иртекен уяв нумай мероприятипе пуян пулĕ. Кунта çакна та палăртмалла: фестивальте кăтартакан кинофильмсен пысăк пайĕ халиччен киноэкран çине те тухман, телеэфирта та пулман.
Шупашкарта Пӗтӗм тӗнчери кинофестиваль çу уйӑхӗн 26-мӗшӗнчен пуҫласа ҫӗртмен 1-мӗшӗччен иртет. Кӑҫал вӑйӑ киновӗн конкурсне 7 ҫӗршыври 11 кинолента хутшӑнӗ: Таджикистанран, Иранран, Арменирен, Норвегирен, Сербирен тата Раҫҫейрен. Пирӗн ҫӗршывран 5 ӗҫ пулӗ. Этника тата регион фильмӗсен конкурсне 19 ӗҫ хутшӑнӗ. Тупăшăва чăваш режиссерĕсен фильмĕсене те кĕртнĕ. Кино юратакансем Александр Осиповăн «Праведник» тата Алексей Ивановăн «Мертвый рассвет» фильмĕсене курса киленме пултараççĕ. Документлӑ фильмсен конкурсĕнче тӳресемпе куракансен 14 ӗҫе хакламалла пулĕ. Кунта та Чăваш Енрен кинокартина пур. «Мальчик из Шоршел» ĕçе Елена Еделеева режиссер хатĕрленĕ, Андриян Николаев космонавт пирки каласа кăтартнă. Фестиваль пынă тапхăрта ятарлă кăтарту та пулĕ. Ку ытларах ачасене пырса тивет. «Ну, погоди!» мультфильмăн 16 серине те, «Мауглие» те курса киленме май пур. Çавăн пекех ăсталăх лаççисем, пултарулăх тĕл пулăвĕсем иртĕç. Кинофестивалӗн тӗп лапамӗ "Волжский" кинотеатр пулӗ. Пĕтĕмпе вара республикăра 19 вырăнта кинофестиваль ĕçĕсемпе паллашма май пур.