Новости за 04.01.2024

Әлмәт районы башлыгы Тимур Нагуманов балалар йортында тәрбияләнүчеләрне бәйрәм белән котлады. Балаларны якынлашып килүче Яңа ел белән котларга Кыш бабай белән Кар кызы килде. Шул мизгелдән алып олысы да кечесе әкият иленә сәяхәт кылды. Бу хакта «Әлмәт таңнары» хәбәр итә.

5 гыйнварда Питрәч спорт мәктәбенең спорт залында офицер-танкист Мөнир Сөнгатуллин һәм реактив артиллерия дивизионы командиры, подполковник Динар Хәмәтов истәлегенә багышланган көрәш буенча традицион ачык турнир узачак. Бу хакта «Алга» сайтында хәбәр ителә.

Саба районы Олы Нырты мәдәният йорты мөдире Гөлназ Гаффарова һәм Завод Нырты авылында крестьян-фермер хуҗалыгы җитәкчесе Рифат Зиатдинов аз керемле һәм әтиләре махсус хәрби операциядә булган балаларны Казанга циркка алып баруны оештырды. Бу хакта http://saby-rt.ru/ хәбәр итә.

Кайбыч районында укучыларның ялын файдалы һәм күңелле итеп үткәрү максатыннан лагерьлар оештырылды. Бу хакта «Кайбыч таңнары» хәбәр итә.

Бу атнада Татарстанда аномаль салкын һава торышы көтелә. Иң салкын көн шимбәгә, 6 гыйнварга, туры киләчәк, бу көнне термометрның терекөмеш баганасы -33 градуска кадәр төшәргә мөмкин. Бу хакта республика Гидрометеорология һәм әйләнә-тирә мохитне күзәтү идарәсе хәбәр итә.

Татарстан Рәисе Рөстәм Миңнеханов республика халкын юлда сак булырга, метеохезмәтләр һәм Гадәттән тыш хәлләр министрлыгының кисәтүләренә игътибар белән карарга чакырды.

Татарстанда Яңа елдан соң Россия Президенты вазифасына Владимир Путин кандидатурасын хуплап имза җыю дәвам итте. 23 декабрьдән ул Казан, Чаллы, Түбән Кама, Әлмәт һәм Яшел Үзәннең зур сәүдә үзәкләрендә оештырыла.

Татарстан Дәүләт автоинспекциясе машина йөртүчеләргә һәм җәяүлеләргә салкында юл хәрәкәте кагыйдәләрен үтәүнең әһәмияте турында искәртә.

Дәүләт Думасында Хөкүмәт Рәисе Михаил Мишустинга ачык һәм өсте ябулы боз шугалакларында физкультура дәресләре үткәрү өчен тиешле шартлар тудыру мөмкинлеген карау үтенече белән мөрәҗәгать иттеләр. Думаның мәгариф комитеты әгъзасы Анна Скрозникова («Яңа кешеләр») шундый инициатива белән чыкты. Бу хакта РИА Новости агентлыгы хәбәр итә.

Россиянең барлык төбәкләрендә РФ Президенты вазифасына Владимир Путин кандидатурасын хуплаган гражданнардан имза җыю дәвам итә, дип хәбәр иттеләр кандидатның сайлау штабында. Бу хакта РИА Новости агентлыгы яза.

Росреестрның Татарстан буенча идарәсенең финанс-икътисад бүлеге башлыгы Дилә Мортазина Россия Президенты Владимир Путинның рәхмәтенә лаек булды. Дәүләт башлыгының шул хактагы боерыгы хокукый мәгълүмат порталында урнаштырылган.

Махсус хәрби операция барган чорда РФ Кораллы Көчләре белән контракт төзегән чит ил гражданнары, шулай ук аларның гаиләләре Россия гражданлыгы алу турында гариза тапшыра ала. Россия Президенты Владимир Путин шул хактагы указны имзалады.

Россиядә Гаилә елы кысаларында бердәм федераль күп балалы гаилә статусы закон нигезендә беркетелергә мөмкин, бу мондый гаиләләргә унификацияләнгән преференцияләр алырга мөмкинлек бирәчәк. Бу хакта РИА Новости агентлыгы Федерация Советының конституцион закон комитеты әгъзасы Александр Башкинга сылтама белән хәбәр итә.

ТР буенча эчке эшләр министрының элекке урынбасары, милиция генерал-майоры Рафил Ногманов профессионализм һәм намуслылык үрнәге, үз эшенә тугры белгеч иде. Аның туганнары һәм якыннарының кайгысын уртаклашып, Татарстан җитәкчелеге җибәргән телеграммада шулай диелә.

Татарстанда һәм Россиянең башка төбәкләрендә алда торган Президент сайлавында бюллетеньнәр салынган сейф-пакетларны махсус маркалар белән саклаячаклар. Республика Үзәк сайлау комиссиясе телеграм-каналында шул хакта искәртте.

Татарстан Язучылар берлегенең Чаллы бүлеге узган елга йомгак ясаган һәм әдәби премияләргә тәкъдим итү өчен үз кандидатларын сайлаган.

Коронавирус сезонлы авырулар рәтенә күчте, вирус мутацияләнде һәм пациентлар чирне авыр кичерми яки хәзер күпсанлы үлем-китем очраклары юк дип фаразларга тулы нигез бар, дип белдерде Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) эпидемиология Үзәк фәнни-тикшеренү институты федераль фән бюджет учреждениесе директоры, Россия Фәннәр академиясе академигы Василий Акимкин.

Россия Президенты Владимир Путин «Татмедиа» АҖ филиалы - «Идел-Пресс» Полиграфия-нәшрият комплексы генераль директоры Әнәс Әскәровны II дәрәҗә «Ватан алдындагы казанышлар өчен» орден медале белән бүләкләде. Шул хактагы указ хокукый мәгълүмат порталында урнаштырылган.

РФ Президенты Владимир Путин Россия – Кытай Мәдәнияте елларын үткәрү турындагы боерыкны имзалады. Документ хокукый мәгълүмат порталында урнаштырылган.

Бүген төнлә Татарстанда аномаль салкын һава торышы көтелә. Көндез температура -18..-23 градус, көнчыгыш районнарда -11..-16 градус тәшкил итәчәк. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

Россия Пенсионерлар берлегенең Чүпрәле бүлекчәсе офисында «Җылы оекбаш» акциясенең иң актив волонтерларын бүләкләү тантанасы булды. Чарада район башкарма комитеты җитәкчесе Рөстәм Мөхәммәтҗанов, Россия Пенсия фондының Чүпрәле районындагы клиентлар хезмәте башлыгы Роза Гафарова катнашты. Бу хакта «Туган як» сайтында хәбәр ителә.

Әлмәт районы башлыгы Тимур Нагуманов Анастасия һәм Арсений Порфирьевларның Яңа ел теләкләрен үтәде. Әтиләре махсус хәрби операция зонасында булган балалар «Теләкләр чыршысы»нда хатлар калдырган. Бу хакта «Әлмәт таңнары» хәбәр итә.

Саба районының спорт оешмалары арасында Яңа ел чыршысын иң яхшы бизәү конкурсында Саба бассейны 1 урынны алды. Бу хакта http://saby-rt.ru/ хәбәр итә.