Новости за 09.01.2024

Лениногорскиның «Алмакай» ат утарындагы атлар катнашында шәһәр башлыгы Кубогына «Күк бүре» милли уены үткәрелде. Уенда Лениногорск, Ютазы, Әлмәт, Бөгелмә районнары катнашты. Бу хакта «Заман сулышы» газетасының сайтында хәбәр ителә.

Бүген Казанның «Ак Барс» хоккей командасы Астананың «Барыс»ын 1:0 исәбенә отты. Матч Казанда «Татнефть Арена» боз сараенда узды.

12 гыйнварда 16:00 сәгатьтә Татарстанның «Хәзинә» милли сәнгать галереясендә декоратив-гамәли сәнгать өлкәсендә әйдәп баручы осталарның берсе, Татарстанның атказанган сәнгать эшлеклесе, Бакый Урманче исемендәге премия лауреаты Луиза Фәсхетдинованың «Гөлханә» күргәзмәсен ачу тантанасы була. Ачылыш тантанасына керү бушлай. Бу хакта Татарстан Мәдәният министрлыгының матбугат хезмәте хәбрә итә.

Россия Президенты Владимир Путин телефоннан Көньяк Сахалиннан 8 яшьлек Кристина Син белән сөйләште. Ул балага беренчел иммунодефицит диагнозы куелган. Дәүләт башлыгы «Теләкләр чыршысы» акциясе кысаларында кызның Байкал күленә бару хыялын чынга ашырды. Бу турыда Кремль матбугат хезмәтендә искәрттеләр.

2045 елда уртача гомер озынлыгы 84,5 яшь булачак - бу оптимистик сценарий. Вакыйгаларның пессимистик торышында бу күрсәткеч 77 яшь тәшкил итәчәк. Росстатның 2046 елга кадәр демографик фаразы нәкъ менә шундый. Бу турыда ТАСС яза.

Россиядә бердәм колл-үзәк һәм Владимир Путинның сайлау штабының иҗтимагый кабул итү бүлмәсе эшли башлады. Россиядә яшәүчеләр Президент вазифасына кандидатка үз тәкъдимнәрен һәм теләкләрен 8-800-301-21-85 күп каналлы телефоны буенча тапшыра ала.

Хөкүмәт Россиядә Гаилә елына планны раслады. Премьер-министр Михаил Мишустин төп бурычлар һәм чаралар турында сөйләде.

Бүген Чүпрәледә "Туган як" редакциясе баш мөхәррире, "Татмедиа" филиалы җитәкчесе Рәзидә Җамалетдинованы лаеклы ялга озату мәҗлесе булды.

Татарстан Рәисе Рөстәм Миңнеханов Казанда төзелә торган кайбер объектларны карады. Видеорепортажны республика җитәкчесенең матбугат хезмәте куйды.

Казанның Киров һәм Мәскәү районнары буенча хәрби комиссариаттан Татарстан хәрбиләренә алгы сызыкка КамАЗ җибәрелде. Аның белән бергә хәрби хезмәткәрләргә маскировкалау челтәрләре, җылы кием, оекбаш, футболка һәм татлы Яңа ел бүләкләрен тапшырдылар.

Гыйнвар башында Татарстандагы аномаль салкыннар төбәк территориясенә Арктикадан салкын һава керүе белән бәйле. Якындагы декадада һаваның уртача тәүлеклек температурасы климат нормасыннан шактый түбән булачак. Бу хакта Казан федераль университеты профессоры, география фәннәре докторы Юрий Переведенцев сөйләде.

Татарстанда булачак Россия Президентын сайлауда хәзерге дәүләт башлыгы Владимир Путинның үзен-үзе тәкъдим итүен хуплап имзалар җыю дәвам итә. Пунктлар Казан, Чаллы, Түбән Кама, Әлмәт һәм Яшел Үзәннең зур сәүдә үзәкләрендә ачылды.

Пенза өлкәсенең Исса шәһәр тибындагы бистәсендә Балалар-яшүсмерләр үзәгендә шул ук исемдәге районның мактаулы гражданины Закир Кормаев истәлегенә багышланган шахмат турниры узды. Бу хакта Пенза өлкәсе татар милли-мәдәни мохтарияте «Вконтакте» социаль челтәрендәге сәхифәсендә хәбәр ителә.

10-15 гыйнварда аномаль салкын һава торышы көтелү сәбәпле, Татарстанда шторм кисәтүе игълан ителде. Гидрометеорология үзәге фаразлары буенча, бу вакытта республика территориясендә аномаль салкын һава торышы, уртача тәүлеклек һава температурасы -18..-24 градус саклана, бу нормадан 9-15 градуска түбәнрәк.

Мәскәү Татар мәдәнияте үзәге артисты, Халыкара конкурслар лауреаты Рәфыйк Вәлитов Түбән Новгород өлкәсенең Мәдәнә авылында Тау шуу бәйрәме оештырды. Анда авыл халкы һәм Мәскәү кунаклары катнашты. Бу хакта Мәскәү милли-мәдәни татар автономиясенең матбугат хезмәте хәбәр итә.

«UFTANMA» башкорт иҗат лабораториясендә 2024 елда беренче очрашу талантлы композитор, баянчы, аранжировка остасы, Башкортстанның атказанган сәнгать эшлеклесе Илшат Яхин истәлегенә багышланачак. Бу хакта «Башинформ» хәбәр итә.

Чиләбе өлкәсенең Югары Уфалы шәһәре Реабилитация үзәгендә тәрбияләнүчеләргә Яңа ел каникулларында Реда Кәбирова җитәкчелегендәге «Мирас» татар үзәге җәмәгатьчелек активистлары кунакка килгән. Бу хакта Чиләбе өлкәсе татар конгрессы «ВКонтакте» социаль челтәрендәге сәхифәсендә хәбәр ителә.

«Әкият» курчак театрында бәйрәм марафоны тәмамланды. 15 декабрьдән 8 гыйнвар аралыгында театрда 29 меңнән артык бала әти-әнисе белән Яңа ел спектаклен караган.

Татарстан Министрлар Кабинетының Гражданлык хәле актларын теркәү идарәсе (ЗАГС) башлыгы урынбасары Ренат Әхмәтҗанов 11 гыйнвардан үз вазифасыннан китәчәк. Республика Министрлар Кабинетының әлеге боерыгын Татарстан Премьер-министры Алексей Песошин имзалады.

Иртәгә, 10 гыйнварда, Татарстан башкаласы метрополитенында юл йөрү бәясе артачак. Бу хакта «Метроэлектротранс» муниципаль унитар предприятиесе Telegram-каналында хәбәр итә.

Блогер Сергей Косенко яңа туган баласын кар көртенә ташлаган һәм шул вакыйга сурәтләнгән видеоны социаль челтәрләрдә тараткан. Хәзер Россия Тикшерү комитеты башлыгы Александр Бастрыкин аңа карата эш кузгатырга кушты.

Көрәшчеләр өч лигада бил алышачак.

Россия Үзәк сайлау комиссиясе Николай Харитоновны Россия Президентына кандидат буларак теркәде. Әлеге карар Үзәк сайлау комиссиясе утырышында кабул ителде. Бу хакта ТАСС хәбәр итә.

Совет чоры шигъриятенең күренекле вәкиле Фатих Кәримгә куелачак һәйкәлнең эскизы һәм төгәл урыны билгеләнгән. Һәйкәл Казанның Яшьләр үзәге каршындагы скверга урнаштырылачак.

20 гынйварда «Пирамида» мәдәни-күңел ачу комплексында «Манзара» спорт һәм музыка премиясе үтәчәк.