Новости за 19.01.2024

«Ел тәрбиячесе - 2024» бәйгесенең муниципаль этабына нәтиҗәләр ясалды. Бәйгедә Чаллының 37 тәрбиячесе көч сынашты. Өч этаптан торган конкурс финалына 9 тәрбияче чыкты. Икенче тур нәтиҗәләре буенча 7 педагог – «Ел тәрбиячесе» һәм 2 педагог «Туган телдә тәрбия һәм белем бирүче төркем тәрбиячесе» номинацияләрендә иң күп бал җыючылар. Бу хакта «Шәһри Чаллы» хәбәр итә.

Һава шартлары начар вакытта Татарстанда юл һәм торак-коммуналь хезмәтләрнең нәтиҗәле эшен оештырырга кирәк. Бу хакта Татарстан Республикасы Рәисе Рөстәм Миңнеханов Хөкүмәт Йортында узган киңәшмәдә белдерде, дип хәбәр итә республика җитәкчесе матбугат хезмәте.

Татарстан Рәисе Рөстәм Миңнеханов укытучылар һәм укучыларның ата-аналары теләкләрен исәпкә алып, республика яңа электрон мәгариф системасын эшләп бетерүне Татарстан Мәгариф һәм фән министрлыгы һәм Цифрлар министрлыгына йөкләде.

Республика юлларында начар һава шартлары аркасында килеп туган хәлгә Татарстан Республикасы Рәисе Рөстәм Миңнеханов үзенең Telegram-каналында аңлатма биргән һәм шәһәрара трассаларның берсендә булган вазгыятьне сурәтләгән видео урнаштырган.

Бу җәйдә Казанда узачак Брикс уеннарында катнашырга берләшмә әгъзасы булган илләр генә түгел, ә берничә дустанә дәүләт тә чакырылачак. Барлыгы 50дән артык ил вәкилләре көтелә. Бу хакта «Татар-информ»га Татарстан спорт министры Владимир Леонов хәбәр итте.

Бүген Татарстанда Россия Почтасының ремонтланган 32 бүлекчәсе ачылды. Ачылу тантанасын видеоэлемтә аша Татарстан Рәисе Рөстәм Миңнеханов үткәрде. Тантана Татарстан Республикасы Дәүләт идарәсен цифрлы нигездә үстерү, мәгълүмати технологияләр һәм элемтә министрлыгы коллегиясе утырышы алдыннан узды.

Татарстан Рәисе Рөстәм Миңнеханов Казанда башланган «Фиджитал Татарстан» фестиваленнән алган тәэсирләре белән үзенең Telegram-каналында уртаклашкан.

Казанда «Фиджитал Татарстан» фестиваленең финал ярышлары башланды. Аларда республиканың төрле районнарыннан 500дән артык спортчы алты дисциплинада җиңү өчен көрәшәчәк. Татарстан Республикасы Рәисе Рөстәм Миңнеханов катнашучыларга һәм тамашачыларга сәламләү сүзе белән мөрәҗәгать итте.

Надежда Турова улын махсус хәрби операциядә югалта — ул һәлак була. Ләкин ханым өметсезлеккә бирелми, кул кушырып утырмый — туган авылында гуманитар ярдәм җыю оештыра. Авылдашлары белән саклангыч челтәрләр тегәләр һәм окоп шәмнәре ясыйлар.

Татарстан Рәисе Рөстәм Миңнеханов Вячеслав Алемасов исемендәге Татарстан Республикасы Дәүләт премиясе турындагы указга үзгәрешләр кертте. Документ хокукый мәгълүмат порталында чыккан.

Татарстанда беренче тапкыр Республика балалар клиник хастаханәсендә балага донор бөерен күчереп утырттылар. Бу хакта «Татар-информ»га Республика клиник хастаханәсендә сөйләделәр.

Соңгы елда Мәскәү белем бирү мәйданчыкларында татар теленнән база курсын тәмамлаганнан соң, югары курсларда укуын дәвам итәргә теләүчеләр саны ике тапкыр арткан. Шуңа күрә алар өчен махсус тест кертү турында карар кабул ителгән. Бу хакта «Татар-информ»га курсларны оештыручы һәм алып баручы, Казан федераль университетының Каюм Насыйри институты методисты, Мәскәүнең Татар мәдәни үзәге педагогы Альбина Вәлиева сөйләде.

Һава торышы начар булу сәбәпле, Казанда кабат 10 баллы бөкеләр хасил булган. Әлеге мәгълүмат Яндекс.Пробки хезмәтендә күренә.

Татарстанда М12 трассасын кар басуга каршы көрәш дәвам итә, дип сөйләделәр «Автодор»да.

Бүген иртән М7 трассасында Казан янында булган массакүләм юл-транспорт һәлакәтенең нечкәлекләре билгеле булды.

Киләсе атнада, 23 гыйнварда, танылган Россия язучысы, Татарстанда үсеп белем алган Шамил Идиатуллинның Мәскәүдә «За старшего» шпион романының презентациясе узачак. Бу хакта ул үзенең Telegram каналында хәбәр итте.

Татарстан Фәннәр академиясенең Гамәли семиотика институты директоры Ринат Гыйльмуллин татарча тавышны текстка әйләндерә торган сөйләмне танып белү синтезы эшли башлаганын әйтте. Сөйләм синтезын хәзерге вакытта speech.tatar сайтында кулланып була.

Бүген Салмачы бистәсендә үлем белән тәмамланган юл-транспорт һәлакәте булган. Бу хакта Казан шәһәр дәүләт автоинспекциясе хәбәр итте.

Казан хакимияте шәһәр башкарма комитетының муниципаль хезмәте вазифалары исемлеген раслады. Анда вазифага билгеләнгәндә һәм алмаштырганда муниципаль хезмәткәрләр үзләренең, тормыш иптәше һәм балигъ булмаган балаларының керемнәре, мөлкәте турында мәгълүмат бирергә тиеш булачак. Карар документлар һәм хокукый актлар җыентыгының яңа электрон чыгарылышында чыкты.

Россия вице-премьеры Дмитрий Чернышенко һәм РФ Президенты ярдәмчесе Игорь Левитин бүген Казандагы рәсми чараларда видеоконференция элемтәсе режимында катнашачак. Бу хакта Татарстан Рәисенең матбугат хезмәте хәбәр итә.

«Татар-информ» агентлыгы «Дзен» каналының даими аудиториясе 20 000 кешегә арткан. Ресурс 2024 ел башында рекордлы билгегә җитте. Искәртеп узабыз, каналга язылучыларны Татарстанда һәм аның башкаласында барган төрле вакыйгалар бер үк дәрәҗәдә кызыксындыра.

Россия Гадәттән тыш хәлләр министрлыгы хезмәткәрләре карга батып калган машиналарны казып чыгара. Юлларны кардан чистарталар һәм реверсив хәрәкәт оештыралар.

Ил халкының 79 проценты Президент Владимир Путинга ышана, респондентларның 81 проценты Россия лидерының эшчәнлеген уңай бәяли. Бу хакта РИА Новости агентлыгы «Иҗтимагый фикер» фондына сылтама белән хәбәр итә.

НАТО илләре гражданнары якындагы 20 елда Россия белән тоталь сугышка әзерләнергә тиеш. Альянсның хәрби комитеты башлыгы Роб Бауэр шулай дип белдерде. Бу хакта РИА Новости агентлыгы хәбәр итә.

2023 елның 25 декабреннән 2024 елның 9 гыйнварына кадәрге чорда Татарстанда яшелчә бәясе сизелерлек артты, ә тавык йомыркасы арзанайды. Татарстанстат мәгълүматлары шуны раслый.