Новости за 21.01.2024

Ютазы районы Бәйрәкә авыл җирлегендә узган халык җыенында район башлыгы Аяз Шәфыйгуллин уллары махсус хәрби операциядә булган ата-аналарга Рәхмәт хатлары тапшырды. Бу хакта «Ютазы таңы» сайтында хәбәр ителә.

Зәйдә күпкатлы йортларда яшәүчеләр арасында үз ишегалларын чистартырга чыгучылар да бар. Октябрь урамының 7нче йортында яшәүчеләр ишегалды җыештыручының үзенә генә кар чистарту авыр булуын аңлап, аңа ярдәм итәргә булган. Бу хакта «Зәй яңалыклары» сайтында хәбәр ителә.

Татарстанның Питрәч районы Царево авылында яшәүчеләр үз йортлары ишегалларын кардан чистартты. Бу хакта районның «Алга» газетасы яза.

Бүген Казанның «Ак Барс» хоккейчылары Мәскәүнең «Спартак» командасын 4:3 исәбенә җиңде. Матч Казанда «Татнефть Арена» боз сараенда узды.

Бүген төнлә һәм иртәгә, 22 гыйнварда, иртән Татарстан территориясендә һава температурасының -25 градуска кадәр төшүе көтелә. Төнлә Татарстанның кайбер районнарында бераз кар яварга мөмкин һәм буран саклана, ул вакытта күз күреме 1-2 километрга кадәр начарлана, шулай ук көчле җил, тизлеге секундына 15-16 метрга кадәр, дип яза «Татар-информ».

Алабуганың Хирург Нечаев урамындагы 16а йортта яшәүчеләр ишегалдын һәм парковка урыннарын чистарталар. Активистлар ишегалларын һәм парковка урыннарын чистарталар, шулай ук күршеләрне коллектив җыештыруда катнашырга чакыралар. Бу турыда alabuganury.ru хәбәр итте.

«Кузбасста 4нче интернат-мәктәпнең 5-6 сыйныф укучылары «Нур Ислам» мәчетендә булды. Кунакларны имам-хатыйб Азат хәзрәт Шәйдуллин каршы алды һәм мәчет буенча экскурсия үткәрде. Укучылар ислам диненең үзенчәлекләре турында күп сораулар бирде һәм Азат хәзрәтнең җавапларын кызыксынып тыңлады. Бу хакта Россия мөселманнары Диния нәзарәте матбугат хезмәте хәбәр итә.

Татарстан Рәисе Рөстәм Миңнеханов үз Администрациясе регламентын раслады. Документ Администрациянең һәм структура бүлекчәләренең эшчәнлеген оештыру тәртибен билгели. Карар хокукый мәгълүмат порталында чыкты.

Казанда, нормативлар буенча, шәһәр юлларындагы кар өч көн эчендә чыгарыла. Әмма хәзерге һава шартларында моңа 1 атна вакыт кирәк булачак. Бу хакта бүген журналистларга Татарстан башкаласы башкарма комитетының тышкы төзекләндерү комитеты рәисе Игорь Сәләхетдинов хәбәр итте.

Татарстанда 7 бала кар астында калганнан соң, Россия Тикшерү комитеты башлыгы Александр Бастрыкин җинаять эше ачарга кушты. Бу хакта Россия Тикшерү комитеты матбугат хезмәтендә хәбәр итәләр.

Мәскәүдә «Россия» күргәзмә-форумында икенче көн «Туганнар-Яратканнар» гаилә форумы уза. Татарстан стендында актив мәдәни программа дәвам итә. Бүген кунакларны «Сабантуй» мавыктыргыч өстәл уены һәм экоквест белән сөендерделәр. Бу турыда Татарстан Сәнәгать һәм сәүдә министрлыгы матбугат хезмәтендә хәбәр иттеләр.

Татарстанда 2024 ел гыйнварының өченче декадасында һаваның уртача температурасы климатик нормадан 2 градуска түбәнрәк булачак. Бу турыда ТР Гидрометеорология үзәге хәбәр итте.

Балтач районында кар көртләрен чистартуга район халкы, волонтерлар да кушылган. Бу хакта Балтач районының рәсми төркемендә хәбәр иттеләр.

Казанда ишегалды территорияләрен җыештыруга 1,5 меңнән артык урам себерүче һәм 162 берәмлек техника, шул исәптән 78 арендага алынганы җәлеп ителгән. Бу хакта бүген журналистларга Татарстан башкаласы башкарма комитетының Торак-коммуналь хуҗалык комитеты рәисе Василий Лысачкин хәбәр итте.

Гадәттән тыш хәлләр министрлыгы хезмәткәрләре Татарстанда кар белән капланган трассаларда калган йөртүчеләргә ярдәм итә. Видео ведомствоның Телеграм-каналында чыкты.

Түбән Новгород, Киров өлкәләрендә, Татарстан һәм Удмуртия республикаларында кар күп яуганнан соң, катлаулы һава шартлары сәбәпле, шәһәр яны һәм пассажир поездлары хәрәкәтендә тоткарлыклар булырга мөмкин. Бу хакта Идел буе транспорт прокуратурасында хәбәр иттеләр.

Иртәгә, 22 гыйнварда, һава температурасының кинәт төшүе көтелә. Бу хакта Татарстан Гидрометеорология һәм әйләнә-тирә мохитне күзәтү үзәге кисәтә.

Балтач районы «Наз» халыкка социаль хезмәт күрсәтү үзәге хезмәткәрләре ял көннәрендә дә үз тәрбияләрендәге өлкән, ялгыз кешеләрне игътибарсыз калдырмый. Алар әби-бабайларның ишегалларын кардан чистартырга ярдәм итте. Бу хакта «ВКонтакте» социаль челтәрендәге «Рәсми Балтач» төркемендә хәбәр ителә.

Аномаль кар яву дәвам итү сәбәпле, Казан Мәгариф идарәсе шәһәр мәктәпләренә иртәгә, 22 гыйнварда, уку процессын дистанцион форматта оештырырга киңәш итте. Бу хакта Татарстан башкаласы мэриясенең матбугат хезмәте хәбәр итә.

«Катлаулы» шартларга карамастан, Әгерҗедә кар чистарту эшләре дәвам итә. Бу хакта Татарстанның Әгерҗе районы башлыгы Ленар Нургаянов телеграм-каналында хәбәр итте.

Татарстанда көчле кар сәбәпле, поездлар тоткарланган. Бу турыда Горький тимер юлы сайтында хәбәр ителә.

Татарстанның Алексеевск районында үз йортлары ишегалларын кардан чистартырга балалар да кушылды. Муниципалитет администрациясе Телеграм-каналына видео куйган.

Татарстан башкаласы бистәләрендә яшәүче ялгыз өлкән кешеләргә кар чистартуда ярдәм күрсәтү мәсьәләләре буенча «Игелекле Казан» кайнар элемтә эше озайтылды. Бу хакта мэриянең матбугат хезмәте хәбәр итә.

Россия Президентына кандидат Владимир Путинның сайлау штабы иҗтимагый кабул итү бүлмәләре эшли башлаганнан бирле гражданнардан 12 меңнән артык мөрәҗәгать килгән. Бу хакта ТАСС хәбәр итә.

Һиндстаннан Россиягә очкан шәхси самолет Әфганстанда һәлакәткә очраган. Ул пассажирлар күчеп утырсын өчен Таҗикстанда төшәргә тиеш булган. Бу хакта Мәскәү төбәкара транспорт прокуратурасында хәбәр иттеләр.