Новости за 04.02.2024

Алабуганың Үзәк китапханәсендә Татарстан язучылар берлеге әгъзасы, Алабуга язучысы, прозаик Лира Ибраһимова белән очрашу узды. Очрашуга «Чулман» әдәби берләшмәсе вәкилләре, КФУның Алабуга институты шәкертләре һәм башка әдәбият сөюче якташларыбыз килгән иде. Бу хакта «Алабуга нуры» яза.

Арча районы Түбән Оры авылы халкы мобилизациянең беренче көненнән үк махсус хәрби операция зонасындагы егетләргә ярдәм күрсәтә. Бу хакта «Арск-информ» хәбәр итә.

Түбән Кама медицина көллияте студентлары иртәдән үк «Яхшы куллар» этләр приютына килделәр һәм оешкан төстә территорияне кардан чистарта башладылар. Бу хакта http://nkamsk-rt.ru/ хәбәр итә.

Азнакай районында 23 февраль — Ватан сакчысы көне уңаеннан уңаеннан уздырылып килгән авыл яшьләренең кышкы спартакиадасы быел Тымытык авылында оештырыла. Кичә «Чатыр-Тау Арена» спорткомплексында иң җитез бадминтончыларны ачыкладылар. Бу хакта «Азнакай» сайтында хәбәр ителә.

Мәскәү Татар мәдәни үзәгендә Түбән Новгород өлкәсенең Краснай авылы тарихына багышланган «Красный Остров и его история» дип аталган китапны тәкъдим иттеләр. Кичәгә әлеге татар авылында туган, бүгенге көндә Мәскәүдә яшәүче милләттәшләребез чакырылган иде. Бу хакта Мәскәү шәһәре татар милли-мәдәни автономиясе төбәк иҗтимагый оешмасының матбугат хезмәте хәбәр итә.

Татарстанда М5 трассасында маршрут транспортының хәрәкәте вакытлыча чикләнде. «Поволжуправтодор» федераль казна учреждениесе мәгълүматлары буенча, чикләү 14.00 сәгатьтән транспорт хәрәкәтендә кыенлыкларга юл куймау максатыннан кертелә.

Синоптиклар фаразлавынча, 4 февраль кичендә Татарстанда һава шартларының бозылуы көтелә. Мондый һава торышы төнлә һәм алдагы көнне көндез дә сакланачак. Әйтик, урыны белән җепшек кар яварга, буран чыгарга, җилнең тизлеге секундына 15-18 метрга кадәр җитәргә, юлларда бозлавык һәм кар көртләре барлыкка килергә мөмкин.

2024 ел Россиядә торак-коммуналь хуҗалык өчен үзгәрешләр елы булырга мөмкин. Вице-премьер Марат Хөснуллин «Россия» күргәзмә-форумында шундый фикере белән уртаклашты. Бу хакта ТАСС агентлыгы хәбәр итә.

2021 елда үткәрелгән халык исәбен алу нәтиҗәләре буенча Россиядә юкка чыккан биш тел, шулай ук «йокыга киткән» бер тел ачыкланган. Бу хакта РБК Россия Фәннәр академиясе галимнәренә сылтама белән хәбәр итә.

«Гаилә ипотекасы» программасы озайтылачак. Вице-премьер Марат Хөснуллин «Россия» күргәзмә-форумында әлеге өлкәдәге шушы һәм башка планнар турында сөйләде. Бу хакта ТАСС агентлыгы хәбәр итә.

4 февраль кичендә Татарстанда һава шартларының бозылуы көтелә. Мондый һава торышы төнлә һәм алдагы көнне көндез дә сакланачак. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

ТР Рәисе Рөстәм Миңнеханов Татарстан Республикасының «Фидакяр хезмәт өчен» медале белән бүләкләү турындагы указны имзалады.

2023 елда Россиядә туристлар агымы күләме 78 миллион сәфәргә җиткән. Шул ук вакытта, 2022 елга карата әлеге сан 20 процентка арткан. РФ вице-премьеры Дмитрий Чернышенко шундый статистика китерде, дип яза ТАСС агентлыгы.

Казан прокуратурасы балага түбәдән кар төшү турындагы мәгълүматны тикшерә башлаган. Бу хакта ТР прокурорының өлкән ярдәмчесе Руслан Галиев хәбәр итә.

Россия Тикшерү комитеты рәисе Александр Бастрыкин мигрантлар өчен хостел оештыру планнарына бәйле рәвештә Чаллыда яшәүчеләрнең хокуклары бозылу турында мөрәҗәгатьләр буенча күрсәтмәләр бирде. Бу хакта Россия Тикшерү комитетының матбугат хезмәтендә хәбәр иттеләр.

Татарстанда төшерелә башлаган «Гашыйклар тавы» фильмының бер өлеше Белоруссиядә төшерелә. Сценарий авторы, режиссер Салават Юзеев һәм продюсер Миләүшә Айтуганова катнашындагы төшерү командасы хәзер Белоруссиядә.

Кукмарада чаңгы-роллер трассасын төзүгә 91,7 миллион сумнан артык акча юнәлдерергә ниятлиләр. Шул хактагы мәгълүмат дәүләт сатып алулары сайтында урнаштырылган.

Дәүләт Думасы Рәисе Вячеслав Володин I дәрәҗә «Ватан алдындагы казанышлар өчен» ордены белән бүләкләнде. Россия Президенты Владимир Путин имзалаган шул хактагы указ хокукый мәгълүмат интернет-порталында урнаштырылган.

РФ Президенты Владимир Путин үзенең указы белән «Ватан сакчылары» фондының функцияләрен киңәйтте. Документ хокукый актлар порталында урнаштырылган.

Бүген, 4 февральдә, Татарстанда болытлы һәм дымлы һава торышы саклана, әмма температура фоны бераз кимиячәк. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

Түбән Камада Татарстан Рәисе каршындагы Дәүләт торак фонды программасы буенча социаль ипотека торагы төзелеше 2024 елда башланачак. Бу хакта «Градостроитель Нижнекамска» паблигында хәбәр ителә, дип яза http://nkamsk-rt.ru/ сайты.

Питрәч редакциясе бер ай элек калай банкалар җыюны игълан иткән иде. Бу эштә хезмәт коллективлары, алар арасында Питрәчнең 2нче мәктәбе, суд приставлары хезмәте, Колай авылындагы «Кыңгырау» балалар бакчасы һәм гаиләләр катнашты. 300дән артык банка җыелды. Аларны Кощакка «Чистое сердце» волонтерлык оешмасына тапшырганнар. Бу хакта «Алга» сайтында хәбәр ителә..

Әлмәттә коммуналь түләүләр бурычлары аркасында ир-атны фатирдан куып чыгарганнар. Суд утырышында торак бинаның муниципалитетныкы булуы ачыкланган, бу расланган. Әлеге фатир ордер нигезендә алынган. Бу хакта шәһәр судының матбугат хезмәте хәбәр итте, дип яза «Әлмәт таңнары».