Новости за 07.02.2024

Зәйгә Татарстан Премьер-министры урынбасары — икътисад министры Мидхәт Шаһиәхмәтов килде. Бу турыда «Зәй яңалыклары» хәбәр итә.

Можга татарлары милли-мәдәни автономиясе 17 февраль көнне Туган тел көненә багышланган бәйрәм чарасына чакыра. Бу хакта «Яңарыш» Удмуртия республикасы татар газетасы «ВКонтакте» социаль челтәрендәге үз сәхифәсендә хәбәр итә.

27 февраль көнне Ульяновскида язучы, популяр китаплар авторы​ Зифа Кадырова белән очрашу була. Бу турыда «Өмет» газетасының телеграм-каналында хәбәр ителә.

Ижевск янында шартлау видеосы төшерелгән видеокадрлар социаль челтәрләрдә таралды. Әлеге хәл ракета двигательләрен планлы сынау вакытында булган. Бу турыда ТАСС агентлыгы Завьялов районы Бердәм дежур-диспетчерлык хезмәтенә (ЕДДС) сылтама белән яза.

Россиядә 1 февральдән 40тан артык төрле социаль түләүләр индексацияләнде, әлеге чаралар 20 млн кешегә кагылды. Бу хакта Президент Владимир Путин Хөкүмәт әгъзалары белән киңәшмәдә әйтте.

Татарстан вице-премьеры Ләйлә Фазлыева республика халкына Россия Президентын сайлауга гаиләләре белән килергә тәкъдим итте. Мондый киңәшне ул Гаилә елына багышланган туры эфир вакытында бирде, дип яза «Татар-информ» хәбәрчесе Динара Прокопьева.

Азәрбайҗанның гамәлдәге президенты Илһам Алиев чираттан тыш президент сайлауларында 93,9 процент тавыш җыеп, алда бара. Гражданнарның хезмәт хокукларын яклау лигасы экспертлары һәм Американың Oracle Advisory Group оешмасы үткәргән экзитпол нәтиҗәләре шушы мәгълүматны бирә. Бу хакта ТАСС хәбәр итә.

Бүген апелляция инстанциясе Казан федераль университетының элеккеге ректоры Илшат Гафуровка чикләү чарасын озайтуны раслады. Бу хакта Мәскәүнең гомуми юрисдикция судлары матбугат хезмәте хәбәр итә.

Казанның Юдино бистәсендәге күпкатлы йорт тәрәзәсеннән әтисе ыргыткан кечкенә кызның хәле уртача авырлыкта. Бу хакта «Татар-информ»га Татарстан Сәламәтлек саклау министрлыгының матбугат хезмәте хәбәр итте.

Татарстан вице-премьеры, республиканың Россиядәге Тулы вәкаләтле вәкиле Равил Әхмәтшин КАМАЗның беренче директоры Лев Васильевны каберенә килеп искә алды. Лев Васильев 2023 елның августында вафат булды һәм Троекуровский зиратында җирләнде.

Бүген Санкт-Петербургта Татарстан Республикасы Рәисе Рөстәм Миңнеханов һәм «Газпром» ГАҖ идарәсе рәисе Алексей Миллер газлаштыру буенча эшләрнең барышы һәм хезмәттәшлекнең башка юнәлешләре турында фикер алыштылар.

Республика бюджетыннан Татарстан Үзәк сайлау комиссиясенә Россия Президентын сайлауларга әзерлек һәм үткәрүгә 54,5 млн сумга якын акча бүлеп бирелгән. Бу акчаларның 85 проценты диярлек сайлау комиссияләре эшчәнлеген тәэмин итүгә китәчәк. Бу хакта Татарстан Үзәк сайлау комиссиясенең 37 нче утырышында комиссия рәисе урынбасары Андрей Нефедов хәбәр итте.

Татарстан Премьер-министры урынбасары Ләйлә Фазлыева ни өчен Россиядә Гаилә елы икенче тапкыр игълан ителүен аңлатты. Бу турыда ул туры эфир вакытында әйтте, дип яза «Татар-информ» хәбәрчесе Динара Прокопьева.

Ульяновск өлкәсенең «Өмет» газетасында «Субханкуловлар Бөтенроссия конкурсында җиңде» дигән язма чыкты.

Татарстан Премьер-министры Алексей Песошин «Киләчәк уеннары» халыкара мультиспорт турнирын әзерләү һәм үткәрү оператив штабы һәм ике эшче төркем составын үзгәртү турында боерыкны имзалады. Документ хокукый мәгълүмат порталында чыккан.

Татарстанда яшәүче ир-ат баланы үтерергә маташуда шикләнелә. Бу хакта «Татар-информ»га Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итте.

13 февральдә 15.00 сәгатьтә Казанның «Чулпан» мәдәният үзәгендә «Гәүһәр» балалар фестивале узачак: бер сәхнәдә татар мәдәниятенең берничә сәнгать төре берләшәчәк.

Хәрби бурычларны үтәгәндә күрсәткән батырлыгы, кыюлыгы һәм каһарманлыгы өчен үз теләге белән хәрби хезмәткә киткән Татарстан Дәүләт Советы депутаты Эдуард Шәрәфиев Батырлык ордены белән бүләкләнде.

8 февральдә Россия Үзәк сайлау комиссиясе Россия Президенты вазифасына кандидатларның соңгы исемлеген билгеләячәк. Бу хакта Татарстан Үзәк сайлау комиссиясенең 37 нче утырышында комиссия рәисе Андрей Кондратьев хәбәр итте.

Чаллыда Җәмигъ мәчете төзелеше дәвам итә. Дини бинаны төзү эшләре меценатлар акчасына алып барыла.

Татарстан Премьер-министры Алексей Песошин Татарстан Инвестиция-венчур фондының Күзәтү советы утырышын уздырды. Анда фондны 2030 елга кадәр үстерү концепциясен расладылар, стартаперлар һәм студентлар өчен «Ел инновациясе» республика бәйгесен башлап җибәрүне хупладылар һәм башка мәсьәләләрне карадылар. Бу хакта Татарстан Рәисе матбугат хезмәте хәбәр итә.

Бүген Казанның Юдино бистәсендә ир-ат бишенче каттагы фатир тәрәзәсеннән 2 яшьлек кызны ыргыткан. Бу хакта «Татар-информ»га гадәттән тыш хәлнең шаһитлары хәбәр итте. Беренчел мәгълүматлар буенча, кызны үтеп баручы тотып алган.

Казанда 21 февральдән 3 мартка кадәр узачак «Киләчәк уеннары» мультиспорт турнирына билетлар сату дәвам итә. Аның рәсми сайтында шул хакта мәгълүмат урнаштырылган.

«Әкият» татар дәүләт курчак театры «Кәрлә – мәктәп баласы» спектаклен чыгарырга җыена. 16, 17 февраль көнне театрда премьера көтелә.

Казанда Ирек мәйданында урнашкан Татарстан Министрлар Кабинеты бинасына капиталь ремонт ясарга ниятлиләр. Төзекләндерү эшләре 35,6 миллион сумга төшәчәк, диелә дәүләт сатып алулары порталында урнаштырылган мәгълүматта.