Новости за 26.02.2024

Махсус хәрби операция зонасындагы ир-егетләр Алмаз Зарипов белән Илназ Имамов гаиләләрендә шатлыклы вакыйга: аларның сабыйлары туды. Бүген Кама балалар медицина үзәгендә нәниләрне өйләренә озату тантанасы булды. Бу хакта «Шәһри Чаллы» хәбәр итә.

1 мартта Мәскәүдә коллекционер Гөлшат Нугайбәкова татар милли баш киемнәре турында сөйләячәк. Бу хакта Татарстан Республикасының Россия Федерациясендәге Тулы вәкаләтле вәкиллеге хәбәр итә.

Бүген, 26 февральдә, Татарстан Язучылар берлеге рәисе урынбасары – Язучылар берлегенең Чаллы бүлеге җитәкчесе, Бөтендөнья татар конгрессының Чаллы бүлеге җитәкчесе, Татарстан Республикасының атказанган мәдәният хезмәткәре, филология фәннәре кандидаты, Татарстан Республикасының Габдулла Тукай исемендәге дәүләт премиясе лауреаты Факил Миңнемөхәммәт улы Сафинның «Минем җанда Галәм яши!» исеме астында 70 яшьлек юбилей кичәсе узды. Бу хакта Бөтендөнья татар конгрессы матбугат хезмәте хәбәр итә.

Россия Президентын сайлау 2024 елда иң мөһим сәяси вакыйга булачак. Бу хакта Татарстанның икътисад министры Мидхәт Шаһиәхмәтов Чирмешән районының йомгаклау утырышында әйтте.

Татарстанда февральнең соңгы көннәрендә һава торышында җитди үзгәрешләр көтелми. Әмма мартның беренче көннәрендә республикада җылытачак, дип хәбәр итә Татарстанның Гидрометеорология үзәге.

Татарстаннан ике идарәче «Россия лидерлары» юбилей бәйгесенең суперфиналы җиңүчесе булган. Аларны бу югары нәтиҗәләре белән Татарстан Рәисе Рөстәм Миңнеханов котлады, дип хәбәр итә республика җитәкчесенең матбугат хезмәте.

Татарстан Рәисе Рөстәм Миңнеханов Россиянең Фәнни-технология үсеше комиссиясе утырышында катнашты. Ул видео-конференция элемтәсе форматында узды, дип хәбәр итә республика җитәкчесенең матбугат хезмәте.

Бүген Татарстан Дәүләт Советы Рәисе Фәрит Мөхәммәтшин Алабуга шәһәрендә булды. Ул эш сәфәрен квалификацияле эшче кадрлар әзерли торган «Алабуга Политех» зур белем бирү үзәге штаб-фатирыннан башлады.

2026 елда Чаллының 400 еллыгы бәйрәм ителәчәк. Төбәк тарихын өйрәнүче Ленар Мифтах әлеге датаны бәйрәм итүгә карата үз фикерен белдерде.

2024 елның июнендә Төркиядә 10 көн ял итү 190 – 220 мең сумга төшәчәк. Бу ике кешегә «барысы да кушылган» форматындагы дүрт йолдызлы кунакханәдә ял итү бәясе.

2024 елның 16 мартыннан Казанда язгы авыл хуҗалыгы ярминкәләрен ачу планлаштырыла. Казан башкарма комитетының бу документы ришвәтчелеккә каршы экспертиза уза.

Бүген Татарстанның Югары судында «әбиләрне буучы» Радик Таһиров эшен карый башладылар. Дәүләт гаепләүчесе җинаятьчене гомерлеккә ирегеннән мәхрүм итүне сорады. Суд утырышында ул Таһиров үз гаебен тулысынча таныган 15 эпизод турында әйтте.

Татарстанда 23 яше тулган ятим балаларга торак сатып алу өчен акча бирелә. Бу акча бер тапкыр бирелә һәм торак фондыннан фатир алуга альтернатива булып тора. Бу турыда Татарстан Рәисе Рөстәм Миңнеханов имзалаган канунда әйтелә.

«Арт-Линия» сәнгатькә ярдәм фондының музыкаль программалар җитәкчесе Татьяна Малышева Татарстанның атказанган артисты исеменә лаек булды. Бу указны Республика Рәисе Рөстәм Миңнеханов имзалаган.

ТР мөфтие Камил хәзрәт Сәмигуллин Лаешта «Ак мәчет «Зәйнәб» Җәмигъ мәчете ачылышында әни исеме белән мәчет төзүне әниләр өчен иң зур бүләк булуын әйтте.

Татарстанның Министрлар Кабинеты республиканың элекке сәламәтлек саклау министры Марат Садыйковка истәлек тактасы кую турында карар чыгарды. Карарны Татарстан Премьер-министры Алексей Песошин имзалаган.

Ренат Вәлиуллин Татарстанның Санкт-Петербург шәһәрендәге һәм Ленинград өлкәсендәге даими вәкиле вазифасыннан азат ителде. Шул хактагы указ Татарстан Рәисе Рөстәм Миңнехановның рәсми сайтында басылган.

Татарстан Рәисе Рөстәм Миңнеханов һәм Татарстанның Дәүләт киңәшчесе Минтимер Шәймиев Г. Р. Державин исемендәге Лаеш төбәге музеен карады. Яңартылган музейда кунакларны Татарстан Рәисе ярдәмчесе Олеся Балтусова, республиканың мәдәният министры Ирада Әюпова, Казан мэры Илсур Метшин һәм музей директоры Фәридә Мортазина озата йөрде. Бу хакта Татарстан Рәисенең матбугат хезмәте хәбәр итә.

Россия Президенты Владимир Путин Төркиядәге коллегасы Рәҗәп Тайип Эрдоганны 70 яшьлеге белән котлады. Телеграмма Кремль сайтында чыкты.

Бүген Татарстан Рәисе Рөстәм Миңнеханов Лаеш шәһәрендә яңа «Ак мәчет «Зәйнәб» мәчетен ачуда катнашты. Республика җитәкчесе бу хакта Телеграм-каналында сөйләгән.

Россия Хөкүмәте торак-коммуналь хуҗалык инфраструктураларын яңартуга тотар өчен төбәкләргә 12 миллиард сум бүлеп бирә. Бу хакта Россия Премьер-министры Михаил Мишустин әйткән.

Танылган банкир һәм лорд финансит, Ротшильдлар нәселенең дүртенче бароны Джейкоб Ротшильд 87 яшендә вафат булган. Бу хакта Ротшильдлар фонды һәм Уоддесдон утарында хәбәр иткәннәр дип яза, РИА Новости.

IТ-белгечләр өчен ташламалы ипотека программасы буенча гомуми кредит лимитын 500 миллиард сумнан 700 миллиард сумга кадәр арттырырга ниятлиләр. РФ Цифрлы үсеш, элемтә һәм массакүләм коммуникацияләр министрлыгы Telegram-каналында урнаштырылган хәбәрдә шулай диелә. Бу хакта ТАСС агентлыгы хәбәр итә.

Татарстан Рәисе Рөстәм Миңнеханов Төркия Президенты Рәҗәп Тайип Эрдоганга 70 яшьлек юбилее уңаеннан котлау телеграммасы юллады. Бу хакта «Татар-информ» агентлыгына ТР Рәисенең матбугат хезмәте җитәкчесе Лилия Галимова хәбәр итте.

ТР Рәисе Рөстәм Миңнеханов Казан метрополитенының «10нчы микрорайон» станциясе төзелеш мәйданчыгында булды. Искәртеп узабыз, әлеге участокта Юлиус Фучик – Академик Завойский урамнары чатында эш бара.