Новости за 01.03.2024

4-6 мартта Бөтендөнья татар конгрессы XII Бөтенроссия татар авыллары эшмәкәрләре җыенын уздыра. Җыенга 40 төбәктән, шулай ук Татарстаннан 800 кече бизнес вәкилләре һәм фермер хуҗалыклары җитәкчеләре җыелачак. Былтыр 500 делегат катнашкан иде.

РФ Президенты Владимир Путин Федераль Җыенга Юлламасында Россиянең Африка һәм Якын Көнчыгыш илләре белән үзара бәйләнеше (Татарстан, ислам дөньясы белән хезмәттәшлек итеп, аны актив рәвештә ныгыта) мөһим роль уйнавын билгеләп үтте, дип белдерде Дәүләт Думасы депутаты Максим Топилин. Ул республика Хөкүмәтенең Казанда БРИКС саммитын да югары дәрәҗәдә үткәрәчәгенә һәм чит илләрдә яңа партнерлар табачагына ышаныч белдерде.

Башкортстан Башлыгы Радий Хәбиров татар җәмәгатьчелеге белән очрашты. Тарих фәннәре кандидаты Илнар Гарифуллин әлеге очрашуга карата үз фикерен белдерде.

Ульяновскиның 64нче мәктәбе базасында ана теле hәм әдәбияты укытучыларының өлкә форумы уза. Анда өлкә мәктәпләренең рус, татар, чуваш, мордва теле укытучылары ел дәвамында башкарылган эшләренә нәтиҗә ясый hәм киләчәккә планнар коралар. ​Бу хакта Ульяновскиның «Өмет» газетасы телеграм-каналы хәбәр итә.

Төрекмәнстан Президенты Сердар Бердымөхәммәдов һәм илнең Халык Мәсләхәте рәисе Гурбангулы Бердымөхәммәдов Татарстан Рәисе Рөстәм Миңнехановны туган көне белән котлады. Бу хакта ТАСС агентлыгы хәбәр итә.

Татарстан Үзәк сайлау комиссиясенә Россия Президентын сайлауда тавыш бирү өчен бюллетеньнәр тапшырдылар. ТР Үзәк сайлау комиссиясе рәисе Андрей Кондратьев тапшыру актына кул куйды һәм бюллетеньнәрне территориаль сайлау комиссияләренә илтү өчен машинага төяүне контрольдә тотты.

Рамазан-шәриф алдыннан Татарстан Республикасы мөселманнары Диния нәзарәте сайтының «Файдалы мәгълүмат» бүлегендә «Рамазан-2024: төп сораулар» сәхифәсе эшли башлады.

Татарстан Рәисе Рөстәм Миңнеханов туган көне белән котлаганнары өчен рәхмәт әйтте. Искәртеп узабыз, бүген республика җитәкчесенә 67 яшь тулды.

Азәрбайҗан Президенты Илһам Алиев Татарстан Рәисе Рөстәм Миңнехановны туган көне белән котлады. Бу хакта ТР Рәисенең матбугат хезмәте җитәкчесе Лилия Галимова хәбәр итте.

Татар басмалары фонды искерә, туза бара, яңалары җитми.

«Татар-информ» агентлыгына билгеле булганча, полиция генерал-майоры Дамир Сатретдинов Татарстан Эчке эшләр министрлыгының яңа җитәкчесе итеп билгеләнде.

ТР Юстиция министрлыгың Эксперт советы әгъзалары күп балалы гаилә статусын сроксыз итү турындагы Татарстан законындагы үзгәрешләрне хуплады. Бу хакта ведомствоның матбугат хезмәтендә хәбәр иттеләр.

Әлки районы Нәби Дәүли исемендәге Базарлы Матак гимназиясендә Дәрдемәнд истәлегенә кичә оештырылган.

Бүген Татарстан Рәисе Рөстәм Миңнехановка 67 яшь тулды. Ул 2010 елдан бирле республика белән уңышлы җитәкчелек итә. Башта – төбәк Президенты, 2023 елдан – ТР Рәисе вазифасында.

Татарстан Республикасы мөселманнары Диния нәзарәте 12 Республикакүләм ифтарына волонтерлар җыю турында игълан итә. Ифтар кунакларын каршы алу, җәмәгать намазын укуны оештыру, ашамлыкларны өләшү һәм ахырдан өстәлләрне җыештыру өчен 16 яшьтән өлкәнрәк 700 волонтер җәлеп итү күздә тотыла.

Татарстан мөфтияте яңартылган «Казан басмасы» тиражының бер өлешен «Беларусь Республикасы мөселманнары дини берләшмәсе»нә җибәрде. Китаплар Беларусь Республикасы мәчетләренә һәм мөселман уку йортларына таратылачак, дип хәбәр итә ТР Диния нәзарәте.

Татарстан Дәүләт Советы Рәисе Фәрит Мөхәммәтшин Татарстан Республикасы Рәисе Рөстәм Миңнехановны туган көне белән котлады. Котлау сүзләрен ул үзенең телеграм-каналына урнаштырган.

Бүген, 1 мартта, Татарстанда тыныч һава торышы сакланачак. Бу хакта ТР Гидрометүзәге хәбәр итә.

Чирмешән районы Түбән Кәминкә авылында җәмәгать эшлеклесе, педагог, Хәсән Туфанның авылдашы Зөфәр Салиевка истәлек тактасы ачылды, дип хәбәр итә ТР Язучылар берлеге матбугат хезмәте.

Әлмәттә «Уңайлы шәһәр мохитен формалаштыру» федераль проекты буенча якын арада шәһәр сусаклагычы территориясенең икенче чиратын төзекләндерү эшләре башлана. Бу хакта район башлыгының матбугат хезмәте хәбәр итә, дип яза «Әлмәт таңнары».

Чаллы хакимияте бинасында яшь гаиләгә торак сертификаты тапшырдылар. Мондый бәхеткә Гариповлар гаиләсе ия булды. Алар 1 кыз һәм 2 малай тәрбияли. Бу хакта «Шәһри Чаллы» хәбәр итә.

Зәй район башлыгы Разиф Кәримов махсус хәрби операция зонасыннан ялга кайтучылар белән очрашты. Ихлас, ачыктан-ачык сөйләшү «Энергетик» Мәдәният сараенда чәй өстәле артында оештырылды. Бу хакта «Зәй яңалыклары» хәбәр итә.

Яшел Үзәннең Осиново бистәсендә чүп яндыру заводы төзелеше 2020 елның уртасында башланды. Әлегә анда эш тукталган. Бу хакта «Яшел Үзән» сайтында хәбәр ителә.

Чистай үзәк китапханәсендә Халыкара туган тел көненә багышланган чара булып узды. Аны «Энҗеләр» әдәби берләшмәсе җитәкчесе Розалия Шәйхетдинова оештырды. Бу хакта «Чистай-информ» хәбәр итә.