Новости за 04.03.2024

Татарстан Дәүләт Советы Рәисе Фәрит Мөхәммәтшин хезмәт ветераны, 1970-1980 елларда ТАССР Югары Советы Президиумы Секретаре Дания Дәүләтшинага «Дуслык» орденын тапшырды. Ул республика файдасына күпьеллык нәтиҗәле хезмәте өчен дәүләт бүләгенә ия булды. Шулай ук аны юбилее белән котладылар. 3 мартта Дания Дәүләтшинага 90 яшь тулды.

Биектау районының Айбаш авылында урнашкан тарихи мәчет бинасының бурасын һәм агач стеналарын җыю эшләре башланды. Күчмә киңәшмәдә Татарстан Республикасының мәдәни мирас объектларын саклау комитеты рәисе Иван Гущин сөйләгәнчә, объект, тәһарәтханә, инженерлык челтәрләре һәм котельныйлар төзелешен исәпкә алып, 90 млн сумга якын дип бәяләнә.

Мәскәүнең Татар мәдәният үзәгендә сугыш ветераны, хәрби орденнар кавалеры, Мәскәү татар җәмгыяте активисты, ЦСКА җитәкчесе, Халыкара Олимпия комитеты әгъзасы Әнвәр Хәйдәр улы Чанышевның тууына 100 ел тулуны билгеләп үттеләр. Бу хакта Мәскәү татарлары автономиясе сайтында хәбәр ителә.

Омск өлкәсенең Муса Җәлил исемендәге Үләнкүл урта гомуми белем бирү мәктәбендә Халыкара туган тел көненә багышланган чара узды. Биредә укучылар үз туган телләрендә чыгыш ясап, шигырь укучылар конкурсында катнашты.

Татарстан Диния Нәзарәтендә Рамазан аен үткәрү тәртипләренә багышланган матбугат очрашуы булды. Татарстан мөфтиенең мөхтәсибәтләр эшчәнлеге буенча урынбасары Равил хәзрәт Зөфәров әлеге очрашуда Рамазан аеның үзенчәлекләре турында сөйләде.

Татарстан Рәисе Рөстәм Миңнеханов Түбән Кама үзәк район күп профильле хастаханәсенең икенче дәвалау корпусында булды. Аны республиканың сәламәтлек саклау министры Марсель Миңнуллин һәм Түбән Кама районы башлыгы Рамил Муллин озатып йөрде, дип хәбәр итә республика җитәкчесе матбугат хезмәте.

Казанда кинәт җылытып җибәрү очрагында су басудан 1200дән артык кеше зыян күрергә мөмкин. Бу хакта эшлекле дүшәмбедә Казан мэриясенең Гражданнарны яклау идарәсе башлыгы Сергей Чанкин әйтте, дип яза «Татар-информ» хәбәрчесе Динара Прокопьева.

Татарстан Рәисе Рөстәм Миңнеханов Түбән Камада искергән «Дуслык» спорт-сәламәтләндерү комплексы базасында төзелгән «СИБУР Арена НК» заманча күп функцияле спорт үзәген ачты. Бу хакта республика җитәкчесе матбугат хезмәте хәбәр итә.

Ульяновск өлкәсенең «Өмет» газетасында Рузия Хәлимованың «Татар театрлары – Сембер сәхнәсендә» дигән язмасы чыкты.

Бүген Татарстан Рәисе Рөстәм Миңнеханов Түбән Кама районында күп балалы гаиләләр яши торган Борок авылында булды, анда 417 җир кишәрлегенә газүткәргечне файдалануга тапшыру тантанасында катнашты. Сәфәр барышында республика җитәкчесе микрорайон халкы белән дә аралашты.

Мордовиянең Ромодан районы Азюрка авылының «Җомга» Җәмигъ мәчетендә хатын-кызлар арасында «Дога» белеменә конкурс узды. «Мордовия мөселман хатын-кызлары берлеге» активистлары төп оештыручылар булды, дип хәбәр ителә Россия мөселманнары шурасы сайтында.

Татарстан Рәисе Рөстәм Миңнеханов Түбән Кама районы Борок авылы микрорайонында күп балалы гаиләләр яши торган 417 җир кишәрлегенә китерелгән газүткәргечне файдалануга тапшыруда катнашты.

29 февральдә Мәскәүдә Россиянең «Безнекеләрне бел» («Знай наших») брендлары конкурсына йомгак ясалды. Анда 12 мең эшмәкәр катнашты — бөтен илдән 2 меңнән артык бренд, алар киләчәктә зур оешмалардан ярдәм алачак. «Туган Батыр» халыкара проекты «Креатив» номинациясендә җиңүче булды. Проект — Татарстаннан бердәнбер катнашучы.

Казахстанның Алма-Ата шәһәрендә көчле җир тетрәү булды, дип хәбәр итә РИА Новости.

Хөкүмәт «Ата-ана даны» ордены яки орден медале белән бүләкләнгән герой-аналарга һәм ата-аналарга бер тапкыр бирелә торган акчалата түләүгә тагын 30 млн сумнан артык акча җибәрә. Бу хакта Россия Премьер-министры Михаил Мишустин имзалаган боерыкта әйтелә.

Татарстан Гидрометеорология үзәге республика территориясендә март аена айлык һава торышы фаразын хәбәр итте.

Дәүләт Думасы депутатлары төркеме 30 еллык стаж өчен пенсиягә ике яшәү минимумы түләүне өстәргә тәкъдим итте. Тиешле закон проекты инде эшләнгән, дип яза ТАСС.

Россиядә Халыкара хатын-кызлар көненә бәйле кыска эш атнасы башланды. Бу хакта РИА Новости яза.

Татарстан Рәисе Рөстәм Миңнеханов ил җитәкчелегенә, спортчыларга һәм республика халкына «Киләчәк уеннары»н үткәрү өчен рәхмәт белдерде. Бу хакта ул үзенең телеграмма-каналында язган.

Кичә кич К.Тинчурин исемендәге Татар дәүләт драма һәм комедия театрыннан янгын аркасында тамашачыларны эвакуацияләгәннәр. Бинадан 30лап кешене эвакуацияләргә өлгерәләр. Бу хакта «Татар-информ» хәбәр итә.

Дүшәмбе көнне Татарстанда болытлы һава торышы көтелә, төнлә һәм иртән томан булырга мөмкин. Республиканың Гидрометүзәге хәбәр иткәнчә, явым-төшем көтелми.

Питрәч ЗАГС бүлегендә махсус хәрби операция зонасына китүче хәрби хезмәткәрнең никахы теркәлде. Бу хакта «Алга» сайтында хәбәр ителә.

Педагог һәм остаз елын ябу тантанасында Аксубайда балалар сәнгать мәктәбенең элеккеге җитәкчесе Галина Сруртдинова Татарстан Мәгариф һәм фән министрлыгының «Мәгарифтәге казанышлары өчен» күкрәк билгесе белән бүләкләнде. Ул балаларны һәрьяклап гармонияле үстерү учреждениесенең уңышлы эшчәнлеген оештырган өчен билгеләп үтелде. Бу хакта «Авыл таңнары» хәбәр итә.

Чистайда Балалар һәм яшьләр иҗат йортында «Кошлар өчен эко-ашханә» муниципаль җимлек конкурсына йомгак ясалды. Җимлекләр конкурсына төрле зурлыктагы һәм дизайндагы 100дән артык иҗади эш тәкъдим ителде. Бу хакта «Чистай хәбәрләре» яза.